சேதமடைந்த பெரம்பலூர்-அரியலூர் தேசிய நெடுஞ்சாலை

வாகன ஓட்டுநர்களுக்கு பாதுகாப்பில்லாத, சேதமடைந்த பெரம்பலூர்-அரியலூர் தேசிய நெடுஞ்சாலையை சீரமைக்க வேண்டுமென, பொதுமக்களும், வாகன ஓட்டுநர்களும் கோரிக்கை விடுத்துள்ளனர்.

- நமது நிருபர்

பெரம்பலூர், ஆக. 24:

என்.எச்-136 தேசிய நெடுஞ்சாலையானது ஆத்தூர் முதல் பெரம்பலூர், அரியலூர் வழியே தஞ்சாவூர் வரை செல்கிறது. பெரம்பலூர்-அரியலூர் நெடுஞ்சாலையில் நாள்தோறும் நூற்றுக்கணக்கான வாகனங்கள் இயக்கப்படுகின்றன. குறிப்பாக, அரியலூரில் உள்ள தனியார் சிமெண்ட் ஆலைகளைச் சேர்ந்த ஏராளமான லாரிகள் சிமெண்ட் மூட்டைகளும், சிமெண்ட் தயாரிக்கத் தேவையான மூலப்பொருள்களும் ஏற்றிச்செல்லப்படுகிறது.

மேலும், வேப்பூர் வட்டாரத்தில் உள்ள கல் மற்றும் கிரஷர் ஆலைகளில் இருந்து நூற்றுக்கணக்கான டிப்பர் லாரிகள் இச் சாலையில் இயக்கப்படுவதால், இந்த சாலை 24 மணி நேரமும் அதிக போக்குவரத்துடன் காணப்படுகிறது.

சேதமடைந்த சாலை: கடந்த சுமார் 10 ஆண்டுகளுக்கு முன் விரிவாக்கம் செய்யப்பட்ட இந்த தேசிய நெடுஞ்சாலையில், கனரக வாகனங்கள் அதிகளவில் சென்று வருவதால், பெரம்பலூர் நகரிலுள்ள 4 சாலை சந்திப்பு முதல் அல்லிநகரம் வரையிலும் சேதமடைந்து குண்டும், குழியுமாக காணப்படுகிறது. இதனால், இரு சக்கர வாகனங்களில் செல்லும் வாகன ஓட்டிகளும், பெரம்பலூர்-தஞ்சாவூர் செல்லும் வாகன ஓட்டுநர்களும் பெரிதும் சிரமத்துக்குள்ளாகியுள்ளனர்.