திமுக கூட்டணியில் பிளவை ஏற்படுத்த முடியாது

திமுக கூட்டணி கட்சிகளிடையே பிளவை ஏற்படுத்த நினைக்கும் எதிர்க்கட்சிகளின் சதித்திட்டம் ஒருபோதும் நிறைவேறாது; எங்களை மிரட்ட நினைத்தவர்கள் மிரண்டுபோயிருக்கிறார்கள் என முதல்வர் மு.க.ஸ்டாலின் கூறினார்.

- 

சேலம், ஆக. 16:

சேலத்தில் இந்திய கம்யூனிஸ்ட் கட்சியின் 26-ஆவது மாநில மாநாடு நடைபெற்று வருகிறது. மாநாட்டில் சனிக்கிழமை நடைபெற்ற நிகழ்ச்சிகளுக்கு கட்சியின் தேசிய பொதுச் செயலர் டி.ராஜா, மாநிலச் செயலர் இரா. முத்தரசன் ஆகியோர் தலைமை வகித்தனர்.

இந்த மாநாட்டில் சிறப்பு அழைப்பாளராக பங்கேற்று முதல்வர் மு.க.ஸ்டாலின் பேசியதாவது: கூட்டணியில் இருந்தாலும் நியாயமான கோரிக்கைகளை முன்வைக்க கம்யூனிஸ்டுகள் தவறியதில்லை. நாங்களும் அவர்களின் கோரிக்கைகளை நிறைவேற்றி வருகிறோம்.

தற்போதுகூட, 1950-இல் சேலம் மத்திய சிறையில் 22 கம்யூனிஸ்ட் நிர்வாகிகள் சுட்டுக் கொல்லப்பட்ட நிகழ்வை நினைவுகூரும் விதமாக நினைவுச் சின்னம் அமைக்க வேண்டும் என முத்தரசன் கோரிக்கை மனு அளித்தார். சேலத்தில் சிறை தியாகிகள் நினைவாக விரைவில் மணிமண்டபம் அமைக்கப்படும். அதற்கான உத்தரவை வழங்கிவிட்டுதான் இந்த மாநாட்டுக்கு வந்துள்ளேன். அதற்கான பணிகள் நாளைமுதல் தொடங்கும்.

திராவிட இயக்கத்துக்கும், பொதுவுடைமை இயக்கத்துக்கும் இடையே இருப்பது கொள்கை நட்பு. சமூகத்துக்கு தேவையான கொள்கை வலுவாக இருப்பதால், நட்பும் வலுவாக இருக்கிறது. எல்லோருக்கும் எல்லாம் என்ற லட்சியத்தின் இரு முகங்களாக திராவிட இயக்கங்களும், பொதுவுடமை இயக்கங்களும் உள்ளன.

கொள்கை உறவின் ஆழத்தை தலைமுறை கடந்தும் எடுத்துச் செல்ல வேண்டும். கொள்கை முரண்கள் எதிரிகளுக்கு இடம் கொடுத்துவிடக் கூடாது.