நீதிபதி யஷ்வந்த் வர்மா பதவி நீக்க நோட்டீஸ் மக்களவையில் ஏற்பு

விசாரிக்க மூவர் குழு அமைப்பு

- 

புது தில்லி, ஆக. 12: வீட்டில் கட்டு கட்டாக பணம் கண்டறியப்பட்ட விவகாரத்தில் அலகாபாத் உயர்நீதிமன்ற நீதிபதி யஷ்வந்த் வர்மாவுக்கு எதிரான குற்றச்சாட்டு குறித்து விசாரிக்க மூவர் குழுவை அமைத்து மக்களவைத் தலைவர் ஓம் பிர்லா செவ்வாய்க்கிழமை உத்தரவிட்டார்.

யஷ்வந்த் வர்மாவைப் பதவி நீக்கம் செய்ய பல்வேறு கட்சிகளைச் சேர்ந்த எம்.பி.க்கள் சார்பில் சமர்ப்பிக்கப்பட்ட பதவி நீக்க நோட்டீஸை மக்களவையில் அனுமதித்த பிறகு, இந்த விசாரணைக் குழுவை அவர் அமைத்தார்.

இக் குழுவில் உச்சநீதிமன்ற நீதிபதி அரவிந்த் குமார், சென்னை உயர்நீதிமன்ற தலைமை நீதிபதி மனீந்திர மோகன் ஸ்ரீவாஸ்தவா, கர்நாடக உயர்நீதிமன்ற மூத்த வழக்குரைஞர் பி.வி.ஆச்சாரியா ஆகியோர் இடம்பெற்றுள்ளனர்.

இதுகுறித்து மக்களவைத் தலைவர் ஓம் பிர்லா மக்களவையில் செவ்வாய்க்கிழமை கூறியதாவது: நீதிபதி யஷ்வந்த் வர்மாவை பதவி நீக்கம் செய்ய பாஜக எம்.பி. ரவிசங்கர் பிரசாத், எதிர்க்கட்சித் தலைவர் ராகுல் காந்தி உள்ளிட்ட 146 உறுப்பினர்கள் தரப்பில் பரிந்துரை அளிக்கப்பட்டது.