கட்சிகளிடம் தேர்தல் ஆணையம் உறுதி

பிகார் வாக்காளர் பட்டியல் சிறப்பு தீவிர திருத்தப் பணிகளை 5 கட்டங்களாக மேற்கொண்டு தகுதிவாய்ந்தவர்கள் அனைவரும் இணைக்கப்படுவார்கள் என்று அரசியல் கட்சிகளின் பிரதிநிதிகளிடம் இந்திய தேர்தல் ஆணையம் வியாழக்கிழமை (ஜூலை 3) உறுதி அளித்தது.

- 

புது தில்லி, ஜூலை 3:

நிகழாண்டு நடைபெறும் பிகார் பேரவைத் தேர்தலை முன்னிட்டு, 22 ஆண்டுகளுக்குப் பிறகு அந்த மாநிலத்தில் மேற்கொள்ளப்படும் வாக்காளர் பட்டியல் சிறப்பு தீவிர திருத்தத்துக்கு எதிர்க்கட்சிகள் கண்டனம் தெரிவித்து வரும் நிலையில், தேர்தல் ஆணையம் இந்த உறுதியை அளித்துள்ளது.

பிகாரில் 2003-ஆம் ஆண்டுக்குப் பின்னர் வாக்காளராகப் பதிவு செய்துகொண்டவர்கள், தாங்கள் இந்தியர்கள் என்பதை நிரூபிக்க பிறப்புச் சான்றிதழ், கடவுச்சீட்டு (பாஸ்போர்ட்) நகல் போன்ற கூடுதல் ஆவணங்களைச் சமர்ப்பிக்க வேண்டும். வேகமான நகர்மயமாக்கல், தொடர்ச்சியாக இடம்பெயர்தல், வாக்களிக்க இளைஞர்கள் தகுதிபெறுதல், உயிரிழந்த வாக்காளர்கள் குறித்து முறையாக தகவல் கிடைக்காதது, வெளிநாட்டில் இருந்து இடம்பெயர்ந்து சட்டவிரோதமாக இந்தியாவில் தங்கியுள்ளவர்களைப் பட்டியலில் சேர்க்காமல் தவிர்ப்பது போன்ற பல்வேறு காரணங்களால் வாக்காளர் பட்டியல் சிறப்பு தீவிர திருத்தப் பணிகள் மேற்கொள்ளப்படுவதாக தேர்தல் ஆணையம் தெரிவித்தது.

எதிர்க்கட்சிகள் எதிர்ப்பு: இது தகுதிவாய்ந்த வாக்காளரின் வாக்குரிமையைப் பறிக்கும் சூழலுக்கு வழிவகுக்கக் கூடும் என்று எதிர்க்கட்சிகள் குற்றஞ்சாட்டின.