மாநிலங்களவைத் தேர்தல்: 3 திமுக வேட்பாளர்கள் அறிவிப்பு

மாநிலங்களவைத் தேர்தலில் திமுக போட்டியிடும் மூன்று இடங்களுக்கான வேட்பாளர்கள் புதன்கிழமை அறிவிக்கப்பட்டனர்.

- 

சென்னை, மே 28:

திமுக கூட்டணியில் உள்ள மக்கள் நீதி மய்யத்துக்கு ஏற்கெனவே ஓரிடம் ஒதுக்கப்படுவதாக அறிவிக்கப்பட்டதையடுத்து, அக்கட்சியின் தலைவர் கமல்ஹாசன் மாநிலங்களவை உறுப்பினராகத் தேர்வாகவுள்ளார். கடந்த முறை திமுக அணியில் இருந்து மாநிலங்களவைக்குத் தேர்வான மதிமுக பொதுச் செயலர் வைகோவுக்கு மறுவாய்ப்பு வழங்கப்படவில்லை.

தமிழகத்தில் இருந்து மாநிலங்களவைக்குத் தேர்வு செய்யப்பட்ட அன்புமணி ராமதாஸ் (பாமக), என்.சந்திரசேகரன் (அதிமுக), எம்.சண்முகம், எம்.முகமது அப்துல்லா, பி.வில்சன், வைகோ (திமுக சார்பில் தேர்வு செய்யப்பட்டவர்கள்) ஆகிய ஆறு பேரின் பதவிக் காலம் ஜூலை 24-ஆம் தேதியுடன் நிறைவடைய இருப்பதால், அந்த இடங்களை நிரப்புவதற்கான தேர்தல் ஜூன் 19-ஆம் தேதி நடைபெறும் என இந்திய தேர்தல் ஆணையம் அறிவித்துள்ளது.

தமிழக சட்டப்பேரவையில் ஆளும் கட்சியான திமுகவுக்கு 134 எம்எல்ஏ-க்களும் (பேரவைத் தலைவருடன் சேர்த்து), திமுக கூட்டணிக் கட்சிகளான காங்கிரஸ், இடதுசாரிகள், விசிக ஆகிய கட்சிகளுக்கு 25 உறுப்பினர்களும் உள்ளனர். ஒட்டுமொத்தமாக திமுக அணிக்கு 159 எம்எல்ஏ-க்கள் இருக்கின்றனர்.