எஸ்.ஒய்.குரேஷி 'முஸ்லிம் ஆணையர்'

நிஷிகாந்த் துபே கடும் விமர்சனம்

- 

புது தில்லி, ஏப். 20: வக்ஃப் திருத்தச் சட்டத்துக்கு எதிராக கருத்து தெரிவித்த முன்னாள் தலைமைத் தேர்தல் ஆணையர் எஸ்.ஒய்.குரேஷியை பாஜக எம்.பி. நிஷிகாந்த் துபே ஞாயிற்றுக்கிழமை கடுமையாக விமர்சித்தார்.

குரேஷி, தனது பதவிக் காலத்தில் 'முஸ்லிம் ஆணையராகவே' செயல்பட்டார் என்று துபே தெரிவித்துள்ளார்.

ஏற்கெனவே உச்சநீதிமன்றம் மற்றும் தலைமை நீதிபதி சஞ்சீவ் கன்னாவுக்கு எதிராக துபே தெரிவித்த கருத்துகள் சர்ச்சையை ஏற்படுத்திய நிலையில், குரேஷி மீது அவர் இத்தகைய விமர்சனத்தை முன்வைத்துள்ளார்.

நாட்டில் வக்ஃப் சொத்துகளின் நிர்வாகத்தை சீரமைக்க வக்ஃப் திருத்தச் சட்டத்தை மத்திய அரசு அண்மையில் நிறைவேற்றியது.

வக்ஃப் வாரியங்களில் முஸ்லிம் அல்லாத உறுப்பினர்கள் நியமனம் உள்பட பல்வேறு அம்சங்களைக் கொண்ட இச்சட்டத்துக்கு எதிர்க்கட்சிகளும் முஸ்லிம் அமைப்புகளும் எதிர்ப்பு தெரிவித்து வருகின்றன.