தண்டனை விதிக்கப்பட்ட 12 பேரை விடுதலை செய்து உயர் நீதிமன்றம் உத்தரவு

மகாராஷ்டிர மாநிலம் மும்பையில் 2006-இல் 180 பேர் உயிரிழந்த ரயில் தொடர் குண்டுவெடிப்பு வழக்கில் சிறப்பு நீதிமன்றத்தால் தண்டனை விதிக்கப்பட்ட 12 பேருக்கு எதிராக போதிய ஆதாரங்கள் இல்லாததால், அவர்கள் அனைவரையும் விடுதலை செய்து மும்பை உயர் நீதிமன்றம் திங்கள்கிழமை உத்தரவிட்டது.

- 

மும்பை, ஜூலை 21:

முன்னதாக, 12 பேரையும் குற்றவாளிகள் என 2015-இல் தீர்ப்பளித்த சிறப்பு நீதிமன்றம், அவர்களில் 5 பேருக்கு மரண தண்டனையும் 7 பேருக்கு வாழ்நாள் சிறைத் தண்டனையும் வழங்கி உத்தரவிட்டது.

கடந்த 2006, ஜூலை 11-இல் மும்பையில் பல்வேறு பகுதிகளில் சென்ற புறநகர் ரயில்களில் வெடிகுண்டுகள் வைக்கப்பட்டு பயங்கரவாத தாக்குதல் நடத்தப்பட்டது. இதில் 180 பேர் உயிரிழந்தனர். பலர் படுகாயமடைந்தனர்.

இந்தச் சம்பவத்தில் தொடர்புடையதாக 12 பேர் கைது செய்யப்பட்டனர். அவர்களிடம் மகாராஷ்டிர பயங்கரவாத தடுப்புப் படை (ஏடிஎஸ்) விசாரணை நடத்தியது. கைது செய்யப்பட்ட 12 பேரும் தடைசெய்யப்பட்ட இந்திய இஸ்லாமிய இயக்கத்தைச் (சிமி) சேர்ந்தவர்கள் என்றும் பாகிஸ்தானைச் சேர்ந்த லஷ்கர்-ஏ-தொய்பா பயங்கரவாத அமைப்புடன் இணைந்து இந்தச் சதித்திட்டத்தில் ஈடுபட்டதாகவும் ஏடிஎஸ் குற்றஞ்சாட்டியது.

இதன் அடிப்படையில் மும்பை சிறப்பு நீதிமன்றத்தில் கடந்த 2015-இல் நடைபெற்ற விசாரணையில் 5 பேருக்கு மரண தண்டனையும் 7 பேருக்கு வாழ்நாள் சிறைத் தண்டனையும் விதிக்கப்பட்டது.

அதன்பிறகு இந்தச் சம்பவம் தொடர்பாக 11 வெவ்வெறு அமர்வுகளின் முன் மனுக்கள் தாக்கல் செய்யப்பட்ட போதும் அவை விசாரணைக்கு எடுத்துக்கொள்ளப்படவில்லை.