தருமபுரி, கிருஷ்ணகிரியில் முதல்வர் கோப்பை விளையாட்டுப் போட்டிகள் தொடக்கம்

தருமபுரி மாவட்ட விளையாட்டு மற்றும் இளைஞர் நலத்துறை சார்பில் மாவட்ட அளவிலான முதல்வர் கோப்பை விளையாட்டுப் போட்டிகள் செவ்வாய்க்கிழமை தொடங்கின.

- 

தருமபுரி/கிருஷ்ணகிரி, ஆக.26:

தருமபுரி மாவட்ட விளையாட்டு அரங்கத்தில் நடைபெற்ற போட்டிகளை ஆட்சியர் ரெ.சதீஷ் தொடங்கிவைத்து பேசியதாவது:

2025-26 ஆம் ஆண்டு முதல்வர் கோப்பைக்கான விளையாட்டுப் போட்டிகளில் பல்வேறு புதிய விளையாட்டுக்கள் சேர்க்கப்பட்டு பள்ளி, கல்லூரி மாணவ, மாணவியர், மாற்றுத்திறனாளிகள், பொதுமக்கள் மற்றும் அரசு ஊழியர்கள் என 5 பிரிவுகளில் 37 விளையாட்டுக்கள் 53 வகைகளில் மாவட்ட, மண்டல அளவில் நடத்தப்படுகிறது.

மாவட்ட அளவிலான விளையாட்டுப் போட்டிகள் செவ்வாய்க்கிழமை தொடங்கியுள்ளது. பள்ளி மாணவர்களுக்கான கைப்பந்து போட்டியில் 272 மாணவர்களும், கோ-கோ போட்டியில் 384 மாணவர்களும், சிலம்பம் 140 மாணவர்களும், கபடி 1500 மாணவர்கள் என 4244 பேர் பங்கேற்றனர்.