ஒகேனக்கல், மேட்டூர் அணைக்கு நீர்வரத்து அதிகரிப்பு

ஒகேனக்கல் அருவிக்கு நீர்வரத்து வியாழக்கிழமை விநாடிக்கு 50,000 கனஅடியாக அதிகரித்துள்ளது.

- 

பென்னாகரம், ஜூன் 26: ஒகேனக்கல் அருவிக்கு நீர்வரத்து வியாழக்கிழமை விநாடிக்கு 50,000 கனஅடியாக அதிகரித்துள்ளது. இதையடுத்து அருவிகளில் குளிக்கவும், காவிரியில் பரிசல் இயக்கவும் தடை விதிக்கப்பட்டுள்ளது.

கேரளம், கர்நாடகத்தில் தென்மேற்கு பருவமழை தீவிரமடைந்துள்ளதால் கர்நாடகத்தில் உள்ள கபினி, கிருஷ்ணராஜ சாகர் அணைகள் முழு கொள்ளளவை எட்டும் நிலையில் உள்ளன. இதனால் அவ்விரு அணைகளிலிருந்து விநாடிக்கு 70,000 கனஅடி தண்ணீர் காவிரியில் திறந்துவிடப்பட்டுள்ளது.

புதன்கிழமை மாலை நிலவரப்படி ஒகேனக்கல்லுக்கு 19,000 கனஅடியாக இருந்த நீர்வரத்து வியாழக்கிழமை காலை 7 மணிக்கு 24,000 கனஅடியாகவும், 10 மணிக்கு 34,000 கனஅடியாகவும் அதிகரித்து, மாலை நிலவரப்படி விநாடிக்கு 50,000 கனஅடியாக உயர்ந்தது.