டாஸ்மாக் மதுக் கடைகளுக்கு எதிரான போராட்டம் குற்றச் செயல் அல்ல

வழக்கை ரத்து செய்தது உயர்நீதிமன்றம்

- 

சென்னை, ஜூன் 16: டாஸ்மாக் மதுக் கடைகளுக்கு எதிரான போராட்டத்தை குற்றச் செயலாகக் கருத முடியாது எனத் தெரிவித்த சென்னை உயர்நீதிமன்றம், 'மக்கள் அதிகாரம்' அமைப்பினர் மீதான வழக்கை ரத்து செய்து திங்கள்கிழமை உத்தரவிட்டது.

கடலூர் மாவட்டம், சிதம்பரம் பகுதியில் உள்ள டாஸ்மாக் கடையை அகற்ற வலியுறுத்தி கடந்த 2016-ஆம் ஆண்டு மே மாதம் 'மக்கள் அதிகாரம்' அமைப்பினர் போராட்டத்தில் ஈடுபட்டனர். இந்தப் போராட்டம் உரிய அனுமதியின்றி நடத்தப்பட்டதாகவும், போக்குவரத்துக்கு இடையூறாக இருந்ததாகவும் கூறி மக்கள் அதிகாரம் அமைப்பைச் சேர்ந்த முருகானந்தம், மணிமாறன் உள்ளிட்ட நிர்வாகிகள் மீது சேத்தியாத்தோப்பு போலீஸார் வழக்குப் பதிந்து, சிதம்பரம் முதலாவது நடுவர் நீதிமன்றத்தில் குற்றப்பத்திரிகை தாக்கல் செய்தனர்.