கிழக்கு உக்ரைன் நகரில் ரஷியா குண்டுமழை

கிழக்கு உக்ரைனின் கார்கிவ் நகரில் மிகப் பெரிய அளவிலான ட்ரோன் மற்றும் ஏவுகணைத் தாக்குதலை ரஷியா நடத்தியுள்ளது.

- 

கீவ், ஜூன் 7: இதில் 3 பேர் பலியாகினர்; 21 பேர் காயமடைந்தனர்.

இந்தத் தாக்குதல், மூன்று ஆண்டுகாலப் போரில் ரஷியா நடத்திய மிகக் கடுமையான தாக்குதல்களில் ஒன்று என்று கூறப்படுகிறது. பறக்கும் குண்டுகள் உள்ளிட்ட பல்வேறு ஆயுதங்கள் இந்தத் தாக்குதலுக்குப் பயன்படுத்தப்பட்டன.

இது குறித்து அந்தப் பிராந்தியத்தைச் சேர்ந்த அதிகாரிகள் கூறியதாவது:

கார்கிவ் நகர் முழுவதும் ட்ரோன்கள் மற்றும் ஏவுகணைகள் மூலம் ரஷியா தீவிரத் தாக்குதல் நடத்தியது. வெள்ளிக்கிழமை இரவு முதல் சனிக்கிழமை அதிகாலை வரை நடத்தப்பட்ட இந்தத் தாக்குதலில் 215 ஏவுகணைகள் மற்றும் ட்ரோன்கள் பயன்படுத்தப்பட்டன. இதில் 87 ட்ரோன்களையும் 7 ஏவுகணைகளையும் உக்ரைன் வான் பாதுகாப்பு தளவாடங்கள் சுட்டு வீழ்த்தின என்று அதிகாரிகள் தெரிவித்தனர்.

அண்மைக் காலமாக உக்ரைனில் ரஷியா நடத்தும் தாக்குதல்களின் தீவிரம், இரு தரப்புகளும் விரைவில் சமாதான ஒப்பந்தத்தை எட்ட முடியாது எனும் அச்சத்தை மேலும் அதிகரித்து வருகிறது. குறிப்பாக, ரஷியாவுக்குள் ரகசியமாக ஊடுருவி, அந்த நாட்டின் விமானத் தளங்களில் நிறுத்தப்பட்டிருந்த குண்டுவீச்சு விமானங்களை ட்ரோன்கள் மூலம் உக்ரைன் தாக்கி அழித்ததற்குப் பிறகு ரஷியா தாக்குதலின் தீவிரம் அதிகரித்து வருகிறது.