உக்ரைன் விவகாரத்தில் டிரம்ப்புடன் புரிந்துணர்வு

ரஷிய அதிபர் விளாதிமீர் புதின்

- 

தியான்ஜின், செப். 1: உக்ரைன் போர் விவகாரத்தில் அமெரிக்க அதிபர் டொனால்ட் டிரம்ப்புடன் கடந்த மாதம் நடந்த சந்திப்பில் புரிந்துணர்வை எட்டியதாக ரஷிய அதிபர் விளாதிமீர் புதின் திங்கள்கிழமை கூறினார்.

சீனாவின் தியான்ஜின் நகரில் நடைபெற்ற ஷாங்காய் ஒத்துழைப்பு அமைப்பு மாநாட்டில் பங்கேற்க வந்த அவர், இது குறித்து கூறியதாவது:

உக்ரைன் விவகாரத்தில் டிரம்ப்புடன் அலாஸ்காவில் கடந்த மாதம் நடைபெற்ற பேச்சுவார்த்தையின்போது இருவரும் புரிந்துணர்வை எட்டினோம்.

இது உக்ரைனில் அமைதிக்கு வழிவகுக்கும் என்று நம்புகிறேன். இந்த நெருக்கடியை உருவாக்கியது மேற்கத்திய நாடுகள்தான். உக்ரைனை நேட்டோவில் இணைக்க அந்த நாடுகள் முயன்றதே இந்தப் போருக்குக் காரணம்.

கடந்த 2014-ல் மேற்கத்திய ஆதரவுடன் உக்ரைனில் நடந்த ஆட்சி மாற்றமும், ரஷியாவுக்கு எதிரான மேற்கத்திய நாடுகளின் நடவடிக்கைகளுமே இந்தப் போரைத் தூண்டின. உக்ரைனை நேட்டோவில் சேர்க்கும் முயற்சிகளை நாங்கள் தொடர்ந்து எதிர்க்கிறோம் என்றார் புதின்.

இருப்பினும், டிரம்ப் வலியுறுத்துவதை ஏற்று உக்ரைன் அதிபர் வொலோதிமீர் ஸெலென்ஸ்கியுடன் நேரடி பேச்சுவார்த்தை நடத்துவது குறித்து புதின் தெளிவாகக் கூறவில்லை.