அதிமுக ஆட்சியின் சாதனைகளை பொது மேடையில் விவாதிக்கத் தயாரா?

முந்தைய அதிமுக ஆட்சியில் நிறைவேற்றப்பட்ட திட்டங்கள், சாதனைகள் குறித்து பொது மேடையில் விவாதிக்கத் தயாரா என்று முதல்வர் மு.க. ஸ்டாலினுக்கு எதிர்க்கட்சித் தலைவரும் அதிமுக பொதுச் செயலருமான எடப்பாடி பழனிசாமி சவால் விடுத்துள்ளார்.

- 

நெய்வேலி, ஜூலை 14:

கடலூர் மாவட்டத்தில் பிரசார பயணம் மேற்கொண்ட அவர், திங்கள்கிழமை நெய்வேலியில் கடலூர் தெற்கு மாவட்ட பெருமாள் ஏரி பாசன விவசாயிகள் சங்கம், முந்திரி உற்பத்தி மற்றும் ஏற்றுமதியாளர் சங்கம், பலாப்பழம் விவசாயிகள் சங்கம் மற்றும் தனியார் பள்ளிக்கூட்டமைப்பு சங்க நிர்வாகிகள், விவசாயிகள் உடனான ஆலோசனைக் கூட்டத்தில் பங்கேற்று பேசியதாவது:

ஒரு சொட்டு மழை நீர் கூட வீணாகக் கூடாது என்பதற்காக நீர் மேலாண்மை திட்டத்தை ஓய்வு பெற்ற அதிகாரிகளை நியமித்து குடிமராமத்து பணிகள் செய்யப்பட்டது. அந்த வகையில் பெருமாள் ஏரி தூர்வார ரூ.119 கோடி ஒதுக்கீடு செய்து பணி நடைபெற்ற வந்த நிலையில் ஆட்சி மாற்றம் ஏற்பட்டது. பணி முழுமையாக நடைபெறவில்லை எனக் கூறப்படுகிறது. அதிமுக ஆட்சி அமைந்ததும் எஞ்சிய பணிகள் நிறைவேற்றப்படும்.

நான் முதல்வராக இருந்த காலம் நெருக்கடியான காலம். வறட்சி, கஜா புயல், கரோனா என பல்வேறு சோதனைகளைக் கடந்து ஆட்சி செய்தேன். அந்த காலத்திலும் விவசாயிகளுக்கு தேவையான உதவிகளை செய்தோம். முந்திரி விவசாயிகளின் கோரிக்கைகள் படிப்படியாக நிறைவேற்றப்படும். தானே புயலால் முந்திரி மரங்கள் பாதித்த போது அதிமுக அரசு முந்திரி கன்றுகளை மானிய விலையில் வழங்கியது.