நீலகிரியில் கொட்டித் தீர்க்கும் கனமழை: மரங்கள் விழுந்ததால் மின் விநியோகம் பாதிப்பு

நீலகிரி மாவட்டத்தில் 4-ஆவது நாளாக திங்கள்கிழமையும் கனமழை பெய்ததால் பல்வேறு இடங்களில் மரங்கள் விழுந்ததன் காரணமாக மின் விநியோகம் பாதிக்கப்பட்டது.

- 

குன்னூர்/கூடலூர், மே 26: நீலகிரி மாவட்டத்தில் 4-ஆவது நாளாக திங்கள்கிழமையும் கனமழை பெய்ததால் பல்வேறு இடங்களில் மரங்கள் விழுந்ததன் காரணமாக மின் விநியோகம் பாதிக்கப்பட்டது.

கூடலூர் மற்றும் பந்தலூர் பகுதிகளில் கடந்த வெள்ளிக்கிழமை முதல் கனமழை பெய்து வருகிறது. இதனால், தேவர்சோலை பேரூராட்சியில் உள்ள கில்லூர், தேவன் எஸ்டேட், ஓவேலி பேரூராட்சிக்குள்பட்ட பல்வேறு இடங்களில் மின் கம்பங்கள், மின் வயர்கள் மீது மரங்கள் விழுந்ததால் மின் விநியோகம் தடைபட்டுள்ளது.

இதனால், மக்கள் அவதியடைந்து வருகின்றனர். மேலும், சாலைகளிலும் மரங்கள் விழுந்ததுடன் பல்வேறு இடங்களிலும் மண் சரிவுகள் ஏற்பட்டுள்ளதால் போக்குவரத்து பாதிக்கப்பட்டுள்ளது.

பந்தலூர் பகுதியில் நாயக்கன் சோலை பகுதியில் ஏற்பட்ட மண் சரிவை பேரிடர் மீட்புக்குழுவினர் சீரமைத்தனர். உதகை-கூடலூர் சாலையில் சில்வர்கிளவுட், நடுவட்டம் பகுதிகளில் சாலையின் குறுக்கே விழுந்த மரங்களையும் அவர்கள் அப்புறப்படுத்தினர்.