எளிமையின் இலக்கணம்; கொண்ட கொள்கையில் உறுதி

எளிமையில் இலக்கணமாகத் திகழ்ந்த இந்திய கம்யூனிஸ்ட் கட்சியின் மூத்த தலைவர் ஆர். நல்லகண்ணு, தான் கொண்ட கொள்கையில் உறுதி கொண்டவர்.

- 

‘தினமணி’ மருத்துவ மலருடன் நல்லகண்ணு (கோப்புப்படம்).

விவசாயக் குடும்பத்தில் பிறந்தவர்: கடந்த 1925ஆம் ஆண்டு டிச. 26-ஆம் தேதி, ஒருங்கிணைந்த திருநெல்வேலி மாவட்டம் ஸ்ரீவைகுண்டத்தில் ராமசாமி-கருப்பாயி தம்பதியின் மூன்றாவது மகனாகப் பிறந்தவர் நல்லகண்ணு. நான்கு சகோதரர்கள், ஐந்து சகோதரிகள் என பெரிய விவசாயக் குடும்பத்தில் வளர்ந்தவர். ஸ்ரீவைகுண்டம் காரனேசன் பள்ளியில் எஸ்.எஸ்.எல்.சி., திருநெல்வேலியில் உள்ள ம.தி.தா. இந்து கல்லூரியில் இன்டர்மீடியட் முடித்தார். பின்னர் தமிழில் 2 ஆண்டுகள் பி.ஓ.எல். படித்துக் கொண்டிருந்தபோது, படிப்பை பாதியிலேயே நிறுத்திவிட்டு, தீவிர அரசியலுக்கு வந்துவிட்டார்.

சுதந்திரப் போராட்டத்தில்... பள்ளிப் பருவத்திலேயே சுதந்திரப் போராட்டத்தால் ஈர்க்கப்பட்டு, பிரிட்டிஷ் அரசுக்கு எதிராக செயல்படத் தொடங்கினார். சிறுவர்களை அணி திரட்டி பாரதியின் பாடல்களை தெருத் தெருவாகப் பாடி சுதந்திரக் கனலை மூட்டினார்.