JONG MA SE NAGMERRIE

EERS moes sy hoor dat haar ongebore baba reeds 'n maand lank dood is en toe is sy fit verklaar om met dié baba in haar maag te gaan werk.

- CARRINGTON SWARTS

Dit is die werklikheid van Jody Arendse (30) van Sarepta in Kuilsrivier nadat dié ma van twee verlede week vir haar normale afspraak dokter toe is.

Arendse was opgewonde toe sy met haar vorige afspraak by die kliniek gehoor het sy verwag 'n dogter.

Die opwinding het in angstigheid en hartseer verander toe sy Vrydag by dié kliniek ingelig is dat daar geen hartklop is nie.

Sy vertel dat sy dieselfde dag na die Karl Bremer Hospitaal verwys is.

"Hulle het gesê dit is 'n noodgeval," sê sy hartseer.

Volgens Arendse is sy reeds vroeg in haar swangerskap ingelig dat sy 'n high-risk-swangerskap sal hê omdat sy asma het.

By die Karl Bremer Hospitaal het die dokter vir haar gesê sy is 18 weke swanger en nie 24 weke soos wat sy aanvanklik gedink het nie.

Sy sê sy was geskok toe die personeel by dié hospitaal sê sy moet Sondag terugkom veral omdat die personeel by die kliniek haar toestand as 'n noodgeval beskou het.

"Ek sê toe vir die dokter ek wil gaan vir 'n tweede opinie."