'TURF WAR' RUK NOU HAND-UIT

BENDES se turf war in Kalbaskraal het die laaste maande vyf jongmense se lewe geëis. Die jongste slagoffer is 'n 14-jarige leerder.

- ■ CARRINGTON SWARTS

Sy sonde was dat hy aan die verkeerde kant van die bendes se onsigbare grens geloop het. Só vertel 'n besorgde ouer en inwoner wat uit vrees vir sy eie lewe nie genoem wil word nie.

Die klein gemeenskap naby Malmesbury leef in vrees weens die voortdurende bendegeweld wat hier heers.

In die mees onlangse voorval is 'n 23-jarige vermoor.

Die jong man is op "American-grond" gedood.

Volgens lt.kol. Malcolm Pojie, 'n polisiewoordvoerder, is 'n man (19) in hegtenis geneem vir die moord en het hy reeds in die hof verskyn.

Hy sê verder die 14-jarige seun is in Junie vermoor.

"Die afgelope paar maande het bendegeweld in Kalbaskraal toegeneem en meestal jongmense in die gemeenskap dood gelaat."

Die bekommerde pa, wat ook 'n jong seun het, sê hulle stil gemeenskap is nou in die hande van die Americans en die Outlaws.

"Dié twee bendes het self besluit waar hulle grense is; die plek is in twee verdeel. Elkeen het sy eie territory."