NIKS STUIT DIÉ JUFFIE SE PLAN

Donker oomblikke spoor haar aan om sukses in lewe te behaal

- KHIRSTEN BOOYS

DIE lewe bestaan uit oomblikke van uitdagings en drome wat ons vorm.

Maar vir Simone Nortje (28) van Blackheath in die Kaap is die een ding waarvoor sy die dankbaarste is nie net oorlewing nie, maar die geskenk van 'n nuwe begin.

Simone sê sy is baie beslis meer as net 'n oorwinnaar.

Sy brei uit: "Ek is die vervulling van 'n lewenslange droom en 'n belofte wat tussen trane en beproewing gebore is."

Nortje is 'n Afrikaans-onderwyser aan die Hoërskool Mondale in Mitchells Plain, met vyf jaar ervaring in laeren hoërskoolonderrig.

Sy vertel sy het al reeds van kleins af "skooltjie-skooltjie" gespeel.

"Taal is vir my nie net 'n middel om inligting oor te dra nie, maar ook 'n manier om mense se gedagtes en emosies uit te druk, en ek hoop om my leerders te inspireer om dieselfde waarde in taal te sien."

Dié juffie sê sy geniet dit om klas te gee, veral wanneer haar stem deur die klaskamer weergalm en sy sien hoe die lig van begrip in haar leerders se oë begin skyn.

"Wat ek die meeste van onderwys hou, is die geleentheid om kinders te bemagtig met kennis en vaardighede wat hulle nie net in die klaskamer nie, maar ook in die wêreld buite kan gebruik."

Sy sê die grootste beloning is om te weet dat sy 'n positiewe invloed op hulle lewe gehad het, en dat hulle in die toekoms die wêreld op hulle eie manier sal vorm.

Sy vertel elke dag wanneer sy voor in die klas staan, soek sy na die gebroke leerders, diegene wat soos sy deur moeilike omstandighede gaan.