ELKE LIED IS TOT SY LOFPRYS

IN 'N wêreld waar musiek dikwels net as vermaak gesien word, staan Jaydene Davids (25) uit as 'n baken van hoop en geestelike vernuwing op die gospel scene van die Kaapse Vlakte.

- KHIRSTEN BOOYS

As deel van die dinamiese gospel-groep "Die Lekker Crew" gebruik sy haar Godgegewe talent om lewens aan te raak en die Evangelie deur musiek te verkondig.

Jaydene sê musiek en sang is kanale waardeur God met sy volk praat.

"Ek sien werklik week ná week hoe mense se lewe verander deur musiek," vertel sy.

Jaydene woon in Grassy Park en sê haar lewe tussen die gemeenskappe van Mitchells Plain, Steenberg en nou Grassy Park, het haar gevorm in die toegewyde evangelis wat sy vandag is.

"My ma se familie was almal óf sangers óf musikante.

"Ek was altyd so amazed oor hoe ons bymekaarkom op familiebyeenkomste, dan lei my ouma ons met liedere terwyl my oupa die trekklavier speel en die hele familie word een, groot koor."

Hierdie vroeë blootstelling aan musiek as 'n vorm van samesyn en aanbidding het die saad geplant vir wat later haar roeping sou word.

Jaydene se eerste formele verskyning as sangeres was in graad 2 toe sy gevra is om die volkslied by haar skool se prysuitdelingseremonie te sing.