Canmoliaeth I'r Merched

DWI'N mynd i ganolbwyntio y tro hwn ar ganu clodydd y merched. Dylai fod dydd swyddogol ar ôl Dolig i foli y merched. Dwi'n gwybod ein bod i fod yn byw mewn cymdeithas mwy cydradd a'n bod yn rhannu dyletswyddau, ond mae Dolig fel petai yn amser lle caniateir pobl i anwybyddu'r ffaith hon.

- Angharad Tomos

Dewch 'laen rwan, pwy weithiodd galetaf yn eich ty chi dros yr Wyl? Ol reit, falle bod chi ddynion wedi plicio dipyn o datws, ond pwy brynodd y rhan fwyaf o'r anrhegion, pwy sy'n dal ati i lanhau a chlirio, pwy sy'n gofalu am ymwelwyr, ac yn gorfod rhoi trefn ar y dyddiau? A hyn - fis wedi dechrau gwneud y mins peis, y pwdin a'r gacen...

Crachen arall i'w chodi ydi'r un sy'n mynnu 'fod Dolig yn well ers talwm.' .' Wfft i'r fath syniad. Dwi wedi cael un o'r Nadoligau gorau, a wyddoch chi pam? Oherwydd y merched.

Ces fis o ddotio tro ar ôl tro at ddoniau merched Cymru, a dwi'n credu fod hynny yn achos dathlu.

Cychwynnodd ddiwedd Tachwedd efo nofel hir-ddisgwyliedig Angharad Price, 'Nelan a Bo.' .' Dyma nofel hanesyddol yn adrodd cyfeillgarwch a chariad Nelan a Bo, o gyfnod plentyndod. Mae'r cyfan yn digwydd dros gwta wyth mlynedd, mewn un lle - pentref Bethel ger Caernarfon. Ond rhwng 1799 a 1807, mae cymaint yn digwydd yn y lle hwn, gyda dyfodiad y chwarel a'r capeli.

Mae Angharad yn dod â'r cyfan yn fyw, drwy brofiadau dramatig Nelan a Bo. Dysgais lawer, ond ffolais ar yr arddull a'r dweud. Dyma Gymraeg coeth, cyfoethog ar ei orau.

Mae y diwydiant cyhoeddi yn wynebu dyddiau anodd, a'r syniad da gafodd Gwasg Carreg Gwalch oedd canolbwyntio ar un llyfr y dydd drwy fis Rhagfyr, gan bwyso arnom i brynu llyfrau yn anrhegion, gan ei fod yn 'Anrheg am oes.' .