அறிவில் ஆட்டமான அறிக்கை, வன்மமான வார்த்தை....

விவாதத்தில் வாதம், விதண்டாவாதம் என்ற இரண்டு உண்டு. புதிய தமிழகம் கட்சித் தலைவர் கிருஷ்ணசாமி இப்போதெல்லாம் விதண்டாவாதம் செய்வதையே வேலையாக வைத்துள்ளார். இந்த விதண்டாவாதிகளின் வேலையே தான் செய்வதை செய்யப்போவதை விவாதிப்பதில்லை, பிறர் செய்பவற்றை விமர்சிப்பதே முழு நேர வேலை. விமர்சிப்பது என்றால் கூட அதில் காரண, காரியம் இருக்கும். வசை பாடுவது என்பதே இத்தகையவர்களின் பேச்சுக்கு பொருத்தமாக இருக்கும்.

- 

திருச்சியில் 'மதச்சார்பின்மை காப்போம்' என்ற பொருண்மையில் விடுதலை சிறுத்தைகள் கட்சியினர் பேரணி நடத்தினர். மதவெறிக்கு எதிரான மதச் சகிப்பை வலியுறுத்தும் பேரணி அது. அதைக் கூட பொறுத்துக் கொள்ள மாட்டாமல், அங்கு நிறைவேற்றப்பட்ட தீர்மானங்களுக்கு பதிலடி தரும் வகையில், 'இந்தியாவை ஹிந்து நாடாக அறிவிக்க வேண்டும்' என, வெறுப்பை விஷமாக கக்கும் வகையில் அறிக்கை ஒன்றை கிருஷ்ணசாமி அளித்துள்ளார்.

அண்ணல் அம்பேத்கர் படத்தை போட்டு அரசியல் செய்யும் கிறிஸ்தவ சாமி, அவர் உள்ளிட்ட அறிஞர் பெருமக்கள் இயற்றிய இந்திய அரசியல் சாசனத்தையே குற்றம் கூறுகிறார்.

"ஒரு மிகப் பெரிய பிரதேசம் மதரீதியாக பிளவுபட்டபின், அதே மத ரீதியான மக்களையும் உள்ளடக்கி, எப்படி மதச்சார்பற்ற தேசமாக விளங்க முடியும் என்பதை பற்றி சிறிதும் சிந்தித்து பார்த்து, அரசியல் வடிவம் கொடுக்கவில்லை" என்கிறார் இந்த அதிமேதாவி. பிரிவினைக்கு பின்னர் இந்தியா, ஹிந்து நாடாகத்தான் அறிவிக்கப்பட்டு இருக்க வேண்டுமாம்.

இந்தியாவில் ஜாதி பிரிவினை தான் பிரதானமாம். மொழி ரீதியான மாநில பிரிவினைகளால், இந்தியாவின் பிரதான பிரச்னைகளுக்கு தீர்வு காண இயலவில்லையாம். ஒருவேளை சின்னச் சின்னதாக ஜாதி மாறி மாநிலம் பிரிக்கப்பட்டு இருந்தால் இவர் வரவேற்றிருப்பாரோ, என்னவோ?