பயமின்றி பறக்க வகை செய்ய வேண்டும்....

பயணங்கள் என்றுமே விபத்துக்குள்ளானவை, பறந்து சென்றாலும் நடந்து சென்றாலும். இது தவிர்க்க முடியாத விதி என்றாலும் நவீன அறிவியல் யுகத்தில் பல்வேறு பாதுகாப்பு முறைகளை ஏற்படுத்திக் கொள்ள முடியும். வளர்ந்த நாடுகள், விபத்தில்லா சொகுசு பயணங்களில் விரைந்து முன்னேறியுள்ளன. குஜராத் மாநிலம் அகமதாபாத்தில் நடந்த விமான விபத்தோ, விதி முந்திற்றோ, மதி பிந்திற்றோ , என்று நினைக்கும் அளவு மோசமாக நடந்துள்ளது.

- 

இது குறித்து பல்வேறு அனுமானங்கள் வெளியாகின்றன. 274 பேரை பலி வாங்கியுள்ள இந்த ட்ரீம் லைனர் விமானங்கள் பாதுகாப்பற்றவை என்ற கருத்து பரவலாக வைக்கப்பட்டுள்ளது. விபத்து 600 அடி உயரத்தை அடைந்த பிறகு நடந்துள்ளது. 50 அடி உயரத்தை அடைந்தவுடன் சக்கரங்களை உள்ளிழுக்காதது ஏன் என்று மாஜி கேப்டன் ஒருவர் வினவியுள்ளார்.

வழக்கம்போல் பழியை மதத்தின் மீது சுமத்துவதற்கு சிலர் வதந்திகளை பரப்பினர். அதற்கு விமான பராமரிப்பு நிறுவனம் துருக்கியைச் சேர்ந்தது என்ற தகவல் வசதியாக போயிற்று. விமானங்கள், விமான நிலையங்கள், விமானத்தில் ஏற்றப்படும் சுமைகளை பராமரிப்பதில் சர்வதேச அளவில் புகழ் பெற்ற, நீண்ட அனுபவம் கொண்ட CELEBI என்ற அந்த நிறுவனம் தான் விபத்தின் தொடக்கப் புள்ளியான சர்தார் வல்லபாய் படேல் சர்வதேச விமான நிலையம் உட்பட ஒன்பது விமான நிலையங்களை இந்தியாவில் பராமரித்து வந்தது. ஆனால், அந்த நிறுவனம் வெளியேற்றப்பட்டு, கடந்த மே 15 முதல் அதானே ஏர்போர்ட் ஹோல்டிங் லிமிடெட் நிறுவனம்தான் இத்தகைய பணிகளை செய்தது என்பது பின்னர் வெளியாயிற்று. எதுவாயினும், வதந்திகளை வாந்தி எடுப்பவர்கள், மதவாத கருத்தாளர்கள் மனிதத்திற்கு சரிப்பட்டு வர மாட்டார்கள்.