Tulo ka pagpamusil sa Cebu City, usa patay

Tulo ka insidente sa pagpamusil ang natala sa siyudad sa Sugbo niadtong Sabado, Hulyo 12 ug Domingo, Hulyo 13, 2025 nga niresulta sa kamatayon sa usa sa mga biktima ug pagkaangol sab sa duha.

- 

Ang unang insidente nahitabo sa Sitio Magpalacer, Barangay Hipodromo, siyudad sa Sugbo pasado alas 7 sa buntag niadtong Sabado.

Ang biktima mao si Divina Borja Tradio, 40 anyos, dunay kaipon, Sitio Paray, Barangay Kasambagan ning siyudad.

Niresponde dayon ang kapulisan sa Mabolo Police Station 4 sa alarma ug sa ilang pag-abot gidala na ang biktima sa tambalanan sa mga personnel sa Cebu City Disaster Risk Reduction and Management Office.

Sa inisyal nga imbestigasyon sa kapulisan, sigon pa sa kaipon sa biktima niabot sila sa lugar kay gibisita ang ilahang higala.

Nasugatan nila ang suspek nga si Miler Buot Monguez, taga Barangay Hipodromo ug bag-o lang nakagawas matud pa sa Cebu City Jail. Giakusahan sila sa suspetsado nga police asset.

Paglabay sa pila ka gutlo ang suspetsado nibunot og kalibre .45 nga armas ug gipusil ang biktima sa likod nga bahin sa lawas ug pagkahuman daling nidagan ug nilayat sa koral padung sa Cebu Business Park.