કડવાશમાંથી ખુદની આઝાદી

લેટ-ગો આપણે માફી માગીએ છીએ ત્યારે એમાં ત્રણ ભાવ સ્પષ્ટ રૂપે વ્યક્ત થવા જોઈએઃ એક, જે બન્યું છે એ માટે પશ્ચાત્તાપ કરતું વિધાન, બે, સ્પષ્ટ શબ્દોમાં ‘આઈ ઍમ સૉરી’ અને ત્રણ, માફ કરી દેવાની વિનંતી. માફી માગતી વખતે આ ત્રણે બાબતોમાં પૂરી નિષ્ઠા હોય તો જ સામેની વ્યક્તિ પર એનો પ્રભાવ પડે.

- રાજ ગોસ્વામી

પકડ મુઝે જોર આતા હૈ....

અલ-હલ્લાજ નામના એક પર્શિયન સૂફી સંત પાસે એક માણસ આવ્યો અને કહ્યું કે એને મુક્ત થવું છે. અલ-હલ્લાજે એને સરળ જવાબ આપવાને બદલે, એમની બાજુમાં એક થાંભલો હતો એ જોરથી પકડી લીધો અને બૂમો પાડવા લાગ્યા કે મદદ કરો... મદદ કરો! લોકો ભેગા થઈ ગયા અને એમની આ હાલત માટે પેલા માણસને ઠપકો આપવા લાગ્યા. અલ-હલ્લાજ ટોળા તરફ ફર્યા અને પૂછ્યું: આ થાંભલાએ મને પકડી રાખ્યો છે કે મેં થાંભલાને?

પેલા માણસને વાત સમજાઈ ગઈ અને એ એમના પગમાં પડી ગયો.

***

ચાર વર્ષની કાનૂની લડાઈ બાદ અભિનેત્રી અને બીજેપી સાંસદ કંગના રનોટે વરિષ્ઠ ગીતકાર જાવેદ અખ્તરની માફી માગી લીધી છે. જાવેદ અખ્તરે એક નિવેદનમાં કહ્યું છે કે આટલાં બધાં વર્ષ પછી મામલો હવે થાળે પડી ગયો છે. એણે માફીનામું લખી આપ્યું છે. દરેક બયાન અને શબ્દો પાછાં ખેંચી લીધાં છે અને ખાતરી આપી છે કે એ એનું પુનરાવર્તન નહીં કરે. મને થયેલી પીડા માટે માફી માગી છે. મારે એ જ જોઈતું હતું અને એ મળી ગયું છે. હું મારો કેસ પાછો ખેંચી લઈશ, એ એનો કેસ પાછો ખેંચી લેશે.

૨૦૧૬માં અભિનેતા હૃતિક રોશન સાથે કંગનાના અંગત વિવાદમાં જાવેદ અખ્તરે ભલમનસાઈથી કંગનાને એવી સલાહ આપી હતી કે એણે રોશનની માફી માગી લેવી જોઈએ. પાછળથી કંગનાએ એ વિવાદ અંગે સાર્વજનિક બયાનો કરીને જાવેદ અખ્તર પર એવો આરોપ મૂક્યો હતો કે એણે હૃતિક રોશનની માફી માગવાનો ઈનકાર કર્યો એટલે જાવેદ અખ્તરે એને ધમકી આપી હતી. આ વાત નિરાધાર હતી. સામાન્ય રીતે સહનશીલ જાવેદ અખ્તરે એનો વાંધો લીધો અને કંગના સામે બદનક્ષીનો દાવો દાખલ કર્યો. વળતામાં કંગનાએ પણ એમની સામે ધાકધમકીનો કેસ નોંધાવ્યો. અંગ્રેજીમાં કહે છે તેમ, આ ખાયા-પીયા કુછ નહી, ગિલાસ તોડા બારહ આના જેવો કિસ્સો હતો અને અંતે ઘીના ઠામમાં ઘી પડી રહ્યું.

સારું થયું કંગનાએ માફી માગી લીધી, સારું થયું જાવેદ અખ્તરે એનો સ્વીકાર કરી લીધો. આપણે અહીં આ બે સેલિબ્રિટીઓની વાત નથી કરતા. આપણે એમનાં વર્તનમાંથી એક અગત્યના બોધપાઠની વાત કરીએ છીએ. અને એ છે સંબંધોમાં ભૂલ સુધારવાની.