રોક્યા એ રોયા...

‘લાલચ બહોત બૂરી બલા હૈ...’ એ વાત આપણે બધા જાણીએ છીએ અને સમજીએ પણ છીએ. તેમ છતાં ‘એકના બે’ કે ‘એકના ચાર’ કરી આપવાની ઑફર કાને પડતાં જ આપણે એ માટે લલચાઈએ તો છીએ જ. હમણાં ગુજરાતમાં બહુ ગાજતું ‘બીઝેડ’નું છેતરપિંડી પ્રકરણ આપણી આવી વૃત્તિનું પરિણામ છે. આવું અગાઉ પણ થયું છે અને હજીય અટકવાનું તો નથી જ.

- મહેશ શાહ (અમદાવાદ)

સાબરકાંઠાના હિંમતનગર તાલુકાના ભૂખ્યાડેરા ગામના ખેડૂતપુત્ર ભુપેન્દ્ર ઝાલા સાયન્સ ગ્રેજ્યુએટ અને પછી એમ.એડ. થયો. ખેતી અને પછી ઈલેક્ટ્રોનિક આઈટેમ્સનો વેપાર કર્યો. સાથે ટ્રસ્ટ સ્થાપીને સેવા કરી અને અમુકને મૂડીરોકાણનું માર્ગદર્શન આપ્યું. એ કામ રોકાણકારો અને એથીય અધિક ભૂપેન્દ્રને ફળ્યું.

એણે સાબરકાંઠાના રણાસણમાં વર્ષ ૨૦૧૬માં પોતાનાં નામ અને અટકના અંગ્રેજી પ્રથમ અક્ષર પરથી બીઝેડ ફાઈનાન્સિયલ સર્વિસ શરૂ કરી. સાથે સાંસ્કૃતિક કાર્યક્રમોમાં રાજનેતાને બોલાવીને ખ્યાતિ મેળવી. એ થકી ઉદ્દેશ પાર પાડ્યો-મળતિયા થકી તથા અમુક શિક્ષકોને એજન્ટ બનાવીને રોકાણ મેળવવાનો. એમાં અમુક ક્રિકેટર અને સેલિબ્રિટીએ રોકાણ પણ કર્યું હતું.

એણે મધ્ય ગુજરાત અને થોડા મહિના પહેલાં રાજસ્થાનના ડુંગરપુરમાં ઑફિસ ખોલી. ચાલાકી ગણો કે કાયદાની છટકબારી, રોકાણકાર સાથે સ્ટેમ્પ પેપર પર લેખિત કરાર કર્યા. એમાં જો કે રોકાણ માટે પૈસા લીધા હોવાને બદલે વ્યાજે ધિરાણ લીધાનું લખ્યું! એ રીતે રાતોરાત ધનિક બનેલા અને ભારે મહત્ત્વાકાંક્ષી ભૂપેન્દ્ર ઝાલા બાપુ વૈભવી જીવન જીવતા તથા સમાજપ્રેમી અને દાનવીરની ઓળખનો લાભ ખાટવા ગત લોકસભાની ચૂંટણીમાં અપક્ષ ઉમેદવારી કરી. અલબત્ત, પછી પાછી ખેંચી લીધી.

ઘણા ભોળા અને લાલચુ લોકો બૅન્કથી વધુ વ્યાજ મેળવવા ભૂપેન્દ્ર ઝાલાની બીઝેડ કંપનીમાં પૈસા રોકતા રહ્યા, પરંતુ થોડા દિવસ પહેલાં અચાનક બ્રેક વાગી. એમાં અમુકને વ્યાજ કે મૂડી સમયસર પરત ન મળ્યાં એટલે લોકોને શંકા જાગી. એમાંથી ખૂલ્યું મોટું કૌભાંડ. લોકચર્ચા મુજબ, અંદાજે છ હજાર કરોડ રૂપિયાનું કૌભાંડ... ગુજરાતમાં ફાઈનાન્સ કંપની દ્વારા રોકાણકારો સાથે કથિત છેતરપિંડીનું આ દાયકાનું સૌથી મોટું કૌભાંડ!

હાલ બીઝેડના ૩૦ વર્ષી સીઈઓ ભૂપેન્દ્રસિંહ ઝાલા ફરાર છે. એને રોકાણકારો ઉપરાંત જિલ્લા અને ગુજરાતની સીઆઈડી ક્રાઈમ પોલીસ શોધે છે.

એકની ટોપી બીજાને અને બીજાની ત્રીજાને... લોકોની બચતની રકમ આવતી એમાં આ ચક્ર ચાલે, પણ પછી સ્કીમ ચલાવનારા માણસની દાનત બાડે એટલે એ બધા પૈસા ઉસેડીને ભાગી જાય.