જલસાઘર

સંઘર્ષથી સફળતાના હાઈવે પર...

- રઘુ જેટલી

આજથી ૪૭-૪૮ વર્ષ પહેલાં હરિયાણાના રોહતકમાં જાટપરિવારમાં જન્મેલો રણદીપ શાળાશિક્ષણ લઈને માર્કેટિંગમાં માસ્ટર્સ કરવા ૧૯ વર્ષની વયે મેલબર્ન (ઑસ્ટ્રેલિયા) જાય છે, જ્યાં ખર્ચાપાણી કાઢવા એ ચીનાઓની રેસ્ટોરાંમાં નોકરી કરે છે, વેઈટર બને છે, કાર ધૂએ છે, ટૅક્સી ચલાવે છે. સન ૨૦૦૦માં પરત આવ્યો ત્યાં સુધીમાં એને ઍક્ટિંગનો એરુ આભડી ગયેલો. જો કે એ પહેલાં પગભર થવા એણે એક ઍરલાઈન કંપનીના માર્કેટિંગ વિભાગમાં નોકરી લીધી. સાથે મોડેલિંગ પણ કરતો. કોઈએ રણદીપને દિલ્હીની નૅશનલ સ્કૂલ ઑફ ડ્રામા વિશે વાત કરી તો એ એમાં ગયો, જ્યાં એ નસીરુદ્દીન શાહના તાલીમવર્ગમાં હાજરી આપતો, સાથે સિનેમામાં ચમકવા સંઘર્ષ કરતો. ૨૦૦૧માં મીરાં નાયરની મોનસૂન વેડિંગ મળી, પણ ઠીક મારા ભાઈ. ૨૦૧૦માં આવી મિલન લુથરિયાની વન્સ અપોન અ ટાઈમ ઈન મુંબઈ, ત્યાર બાદ તિગ્માંશુ ધુલિયાની સાહેબ બિવી ઔર ગૅન્ગસ્ટર, ૨૦૧૨માં મધુર ભંડારકરની હીરોઈન, જેમાં એ ક્રિકેટર અંગદ પૉલ બનેલો.

અને ૨૦૧૪માં આવે છે ઈમ્તિયાઝ અલીની હાઈવે... સહકલાકાર આલિયા ભટ્ટ. હાઈવે પછી તો રણદીપ કારકિર્દીના ફ્રી-વે પર હતો. સલમાન સલમાન ખાનની સુલતાનમાં ટૂંકી, પણ અસરદાર ભૂમિકામાં રણદીપ છવાઈ ગયેલો.