એક છોકરી ગમી છે...

બેકારીથી કંટાળીને કવિ શુભમ્ પોતાની જ કવિતાઓ, પોતાના જ કાવ્યસંગ્રહો અને સાહિત્યનાં બીજાં પુસ્તકોની થપ્પી ડી એના પર ચઢી પંખા પર લટકવા છતો હતો ત્યાં હોન વાગ્યો. સામા છેડે કોલેજકાળની એની ગર્લફ્રેન્ડ અમીનો રેશમી અવાજ સંભળાયો. શુભમે હાલપૂરતો આત્મહત્યાનો પ્લાન પડતો મૂકી અમી પર કૉન્સન્ટ્રેટ કર્યું..

- સંજ્ય છેલ

એંક જમાનામાં કૉલેજની છોકરીઓને યુવા-કિવ શુભમ્ અને એની કવિતા બહુ ગમતી, પણ પછી એ ગુજ્જુ છોકરીઓને કવિ કે કવિતા કરતાં પૈસા વધારે ગમવા માંડ્યા એટલે એ બધી પૈસાવાળાને પરણી ગઈ.

અને આજે ૩૦ વરસનો કુંવારો વિ શુભમ્ ક્યારેક જાહેરાત લખીને કે મુશાયરામાં મળતાં કવર (પુરસ્કાર) પર માંડ જીવી જતો. પ્રેમાળ કવિની લાગણીઓ અવારનવાર ભડકી ઊઠતી, પણ ખિસ્સામાં તો હંમેશાં ઠંડક એટલે કે કડકી જ રહેતી. એક વાર એ પા ડઝન કેળાં લઈને ઘરે આવતો હતો તો મકાનના મશ્કરા છોકરાએ પૂછ્યું: ‘શું વાત છે કવિ, આજે ત્રણત્રણ કેળાં ખરીદ્યાં? ઘરે પાર્ટી-બાર્ટી છે કે શું?’

 સામે શુભમે ધમકી આપીઃ ‘એક છુટ્ટી કવિતા ફેંકું કે?’

 અને છોકરા તરત જ ત્યાંથી છૂ.

આખરે કાયમી કડકીથી કંટાળીને કવિએ આપઘાત કરવાનું નક્કી કર્યું. ઘરમાં ઊંચું ટેબલ કે ખુરસી નહોતાં એટલે પોતાની જ જૂની-નવી કવિતાઓ, પોતાના જ ૧૦-૧૨ કાવ્યસંગ્રહોઅને સાહિત્યનાં બીજાં પુસ્તકોની થપ્પી કરી એના પર ચઢીને પંખા પર લટકવા જતો હતો.  એવામાં ફોન વાગ્યો. શુભમને થયું: ‘મુશાયરા માટે ફોન હશે તો? સુસાઈડ તો ગમે ત્યારે થાય, મુશાયરો થોડો છોડાય?’

જો કે ફોનમાં કૉલેજકાળની ગર્લફ્રેન્ડ અમીનો રેશમી અવાજ સંભળાયો. અમી પૈસાવાળી છોકરી હતી. પૈસાવાળાની છોકરીઓ સુંદર જ હોય છે અથવા પૈસાવાળાની છોકરીઓ ધીમે ધીમે સુંદર લાગવા જ માંડે છે એવું શુભમ્ ત્યારે પણ માનતો અને અત્યારે પણ. પૈસાદાર અમીએ પોતાનાથી વધુ પૈસાવાળા છોકરા સાથે લગ્ન કરી લીધાં હતાં.

એનો મહારાષ્ટ્રિયન પતિ આનંદભાઉ મ્હાલે સમાજસેવક-કમ-બિઝનેસમૅન એટલે કે પાકો રાજકારણી હતો એટલે નૅચરલી, એની પાસે જેમ પ્રજા માટે સમય ઓછો હોય એમ પત્ની માટે પણ સમય નહોતો. અમી સાથે હનીમૂન પર યુરોપ ગયેલો ત્યારે પણ સ્વિત્ઝરલૅન્ડની બૅન્કોમાં આંટા મારીને એ દેશસેવા કર્યે રાખતો.

અમી એની અમીર લાઈફમાં શુભમને બોલાવીને એની રોમાન્ટિક કવિતાઓ સાંભળતી. બદલામાં શુભમને મોબાઈલ ફોન, બ્રાન્ડેડ ગૉગલ્સ કે કૅશ ગિફ્ટમાં આપતી. શુભમને થતું કે એની કવિતાઓની સાચી કદર ભલભલા સાહિત્યકારો નથી કરી શક્યા, એકમાત્ર અમી જ કરી શકી છે.

આજે અમીએ ફોન કરીને શુભમને ફાઈવ સ્ટાર હોટેલના ગાર્ડન કૅફેમાં બોલાવેલો. થોડી વાર પહેલાં જિંદગીના ગમમાં મરવા માગતો કવિ અત્યારે વિદેશી રમ ઢીંચતો હતો.