લાકડાનું ફર્નિચર સાચવવું એટલું મુશ્કેલ નથી..

ઊધઈ હોય કે ચોમાસાનો ભેજ, આવી સમસ્યાનો ઉપાય આપણી આસપાસ જ છે!

- વિશ્વા મોડાસિયા

ઘર ખરીદ્યા પછી કોઈને પણ ચાર દીવાલની વચ્ચેની એ જમીનને ખરા અર્થમાં ઘર બનાવવાનો વિચાર આવે અને એમાં સૌપ્રથમ વારો આવે ફર્નિચરનો. આજકાલ ઘર સજાવવા સ્ટીલ સહિત અન્ય ધાતુનો ઉપયોગ કરવામાં આવે છે. શહેરોમાં હવે મોટા ભાગનાં ઘરોમાં બારીની ફ્રેમમાં લાકડું વપરાતું નથી, ક્યાંક દરવાજા બહારનો સેફ્ટી ડોર પણ મેટલનો હોય છે. જો કે આજે પણ મોટા ભાગનું રાચરચીલું લાકડાનું હોય છે. એ જ રીતે ઘરની સજાવટમાં પણ લાકડાની જુદી જુદી ચીજ કામ આવે છે. કાચ કે બીજા પ્રકારનાં સુશોભનની સાથોસાથ હાથબનાવટના લાકડાના શો-પીસથી ઘરને સજાવવાનો ક્રેઝ પણ કાયમી ચલણ જેવો છે. લોકો બહારગામ ફરવા જાય ત્યારે યાદ રૂપે લાકડા કે બામ્બુની કોઈ ને કોઈ વસ્તુ લેતા આવે છે.

– તો ચાલો, આજે લાકડાનાં રાચરચીલાંની સંભાળ વિશે વાત કરીએ.

લાકડાની ઘણીખરી ચીજ આમ તો ખાસ્સી ટકાઉ હોય છે, પણ હા, ચોમાસામાં ભેજ લાગવાને કારણે પણ લાકડું સડવાની શક્યતા ખરી. જો ફર્નિચર ભેજને કારણે ફૂલી ગયું હોય તો એ ભેજને સૂકવવા માટે સૂકાં પાંદડાંનો ઉપયોગ કરી શકો છો. આ સિવાય ફર્નિચરને નિયમિતપણે પૉલિશ કરતાં રહેવાથી પણ એનું આયુષ્ય લાંબું રહી શકે છે.