આયુષી વ્યાસ: મક્કમ મનોબળથી એમણે ધાર્યું નિશાન પાડ્યું પાર!

આજેય જ્યાં અમુક વિસ્તારમાં સાસરે લાજ કાઢવાનો રિવાજ છે એવા સૌરાષ્ટ્રમાં આ પુત્રવધૂ તો સસરા સાથે ૧૨ બોરની ગન લઈને કૉમ્પિટિશનમાં ઊતરે છે અને સસરા-વહુ બન્ને મેડલ પણ મેળવે છે. પતિ-સાસરિયાંનાં પ્રોત્સાહનથી આજે આ મહિલા રાષ્ટ્રીય સ્તરે ક્વૉલિફાય થનારી સૌરાષ્ટ્રની પ્રથમ લેડી શૂટર બની છે.

- દેવેન્દ્ર જાની

વાત છે જાન્યુઆરી, ૨૦૨૧ની. રાજ્યકક્ષાની રાઈફલ શૂટિંગ સ્પર્ધા સુરેન્દ્રનગર જિલ્લાના દસાડા ગામમાં હતી. અનેક નિશાનેબાજ એમાં પોતાનું કૌવત બતાવવા તૈયાર હતા, પરંતુ બધાની નજર હતી બે સ્પર્ધક પર.. અને સ્પર્ધાનું પરિણામ જાહેર કરવામાં આવ્યું ત્યારે આખું મેદાન તાળીના ગડગડાટથી ગુંજી ઊઠ્યું. કારણ, આ બે સ્પર્ધક હતાં સસરા અને એમની પુત્રવધૂ!

હા, આ શૂટિંગ કૉમ્પિટિશનમાં શ્વશુરને બે કૅટેગરીમાં ગોલ્ડ મેડલ અને એમનાં પુત્રવધૂને એ જ બે કૅટેગરીમાં સિલ્વર મેડલ મળ્યા.

દસાડા જેવી નાની નગરીમાં યોજાયેલી આ સ્ટેટ લેવલ શૂટિંગ સ્પર્ધા સસરા-પુત્રવધૂને એકસાથે મળેલા મેડલથી મોટી બની ગઈ. ગુજરાત જ નહીં, કદાચ રાષ્ટ્રીય સ્તરે પણ એવું પહેલી વાર બન્યું હશે કે સસરા અને પુત્રવધૂ બન્ને સાથે પ્રેક્ટિસ કરતાં હોય ને સાથે શૂટિંગ સ્પર્ધામાં ઊતરતાં હોય અને સાથે પદક પણ જીત્યાં હોય.

આ શ્વશુર છે ગોંડલની સુપ્રસિદ્ધ ભુવનેશ્વરી માતાજીની પીઠના આચાર્ય અને વડા ઘનશ્યામજી મહારાજ, તો એમનાં પુત્રવધૂ છે આયુષી વ્યાસ. શ્વશુરનો વારસો જાળવનારાં સૌરાષ્ટ્રનાં પ્રથમ મહિલા શૂટર.

સસરા સામે લાજ કાઢીને ચાલવાનો રિવાજ હજી જ્યાં જોવા મળે છે એવા સૌરાષ્ટ્રમાં કોઈ પરિણીતા ગન હાથમાં લઈને નિશાન તાકતી હોય અને સસરાની સાથે શૂટિંગની પ્રેક્ટિસ કરતી હોય એની કલ્પના કરવી પણ કદાચ અશક્ય ગણાય, પરંતુ આયુષીએ આજની યુવાપેઢીને એક નવી રાહ બતાવવાનું કામ કર્યું છે. તો બીજી બાજુ સસરાજીએ શૂટિંગ સ્પોર્ટ્સનો વારસો પુત્રવધૂને આપ્યો, જે આયુષીબહેને મહેનત કરીને ખરા અર્થમાં સાચવ્યો છે.