અદાણી પ્રકરણઃ કોર્ટના આદેશથી કોની કોની પરીક્ષા?

સર્વોચ્ચ અદાલતે અદાણી-હિન્ડનબર્ગ કેસમાં સેબીને તપાસનો આદેશ આપવા સાથે એક ખાસ કમિટી નિયુક્ત કરી છે. હવે આ તપાસના પોટલામાંથી શું બહાર આવે છે એના પર સૌની નજર રહેશે, કારણ કે…

- જયેશ ચિતલિયા

ઉદ્યોગપતિ ગૌતમ અદાણીઃ વિશ્વાસની કટોકટીમાંથી બહાર આવશે?

અદાણી પ્રકરણ ચર્ચાને ચાકડે ચડ્યું એને દોઢેક મહિનાનો સમય વીતી ગયો છે. આ દિવસોમાં અદાણી નામ સતત ચર્ચામાં, વિવાદમાં, સવાલોમાં અને સંદેહના ચોકઠામાં રહ્યું છે. ગ્રુપના ચૅરમૅન ગૌતમ અદાણી એમના જીવનના સૌથી આકરા પડકારોમાંથી પસાર થઈ રહ્યા છે એ વાત નિશ્ચિત છે. વિશ્વના સૌથી ધનવાનોની યાદીમાં એ પ્રથમ પાંચના ક્રમમાંથી બહાર નીકળી લગભગ ૩૦મા ક્રમે આવી ગયા છે. આટલા ટૂંકા સમયગાળામાં કોઈની મૂડીનું આટલું જબરદસ્ત ધોવાણ થયું હોય એવો આ વિશ્વનો પ્રથમ કિસ્સો હશે.

ખેર, જે થઈ ગયું એ આપણી સામે છે અને જે કંઈ થવાનું છે એની આપણને ખબર નથી, છતાં એક બાબત પાક્કી છે કે આ પ્રકરણમાં અદાણી ગ્રુપ પર જે ગંભીર આક્ષેપ થયા છે એને કારણે એની માટે વિશ્વાસની કટોકટી સર્જાઈ છે. હવે આખો મામલો સુપ્રીમ કોર્ટમાં ગયો છે ત્યારે અદાલતે આપેલા તપાસના આદેશના પરિણામ પર બધાની નજર રહેશે. ઈન શૉર્ટ, આ કેસ હાઈ પ્રોફાઈલ તો છે જ, સાથે સાથે આમાં બજાર અને રોકાણકારો તેમ જ કૉર્પોરેટ સેક્ટરનાં હિતનો પણ મુદ્દો આવી જાય છે. આ કેસમાં થનારી તપાસ અને એના પરિણામથી એક યાદગાર દાખલો બેસશે. આ સાથે નિયમન સંસ્થા સેબીની પણ પરીક્ષા થશે.