શું છે વળી આ સિમ સ્પૅપિંગની બલા?

ઑનલાઈન લુટારાઓની ટોળકીમાં સિમ સ્લૅપર્સ નામની એક નવતર પ્રજાતિ સક્રિય થઈ ગઈ છે, જે આપણા સિમ કાર્ડની માહિતી પરથી ડુપ્લિકેટ સિમ ઍક્ટિવેટ કરાવીને ગણતરીની મિનિટોમાં આપણું બૅન્ક એકાઉન્ટ સફાચટ કરી દે છે. પાછલા એક વર્ષમાં અમેરિકા જેવા દેશમાં પણ રોજનાં ચારથી પાંચ સિમ સ્લૅપ કરી જાણનારા આ શાતિર ધુતારાઓની શી છે ટેક્નિક?

- ઉમંગ વોરા (મુંબઈ)

આશરે દોઢ મહિના પહેલાંનો કિસ્સો છે. દિલ્હીના એક વેપારીભાઈને અજાણ્યા નંબરથી સતત કૉલ્સ અને મિસ્ડ કૉલ્સ આવવા લાગ્યા. થોડી વાર વિચારીને એ ભાઈએ એક ફોન રિસીવ કર્યો, પણ સામેથી કોઈએ જવાબ ન આપ્યો. ત્યારે તો આ ઘટના કોઈનું અટકચાળું છે એમ સમજીને વેપારીભાઈ કામમાં પરોવાયા, પણ પછી એમને ખબર પડી કે એમના બૅન્ક એકાઉન્ટમાં થોકબંધ ટ્રાન્ઝેક્શન્સ થયાં છે અને ગણતરીની મિનિટોમાં એમના ખાતામાંથી પૂરા પચાસ લાખ રૂપિયા ઊપડી ગયા છે!

પોલીસ પાસે પહોંચી આપવીતી-ફરિયાદની વિધિ સંપન્ન કરી ત્યારે એ વેપારીભાઈને જાણવા મળ્યું કે આપણા ડિજિટલ યુગમાં અવતરેલા નવતર ઈ-લુટારાઓએ સિમ સ્પૅપિંગથી એમને અડ્યા વગર એમના રૂપિયા સેરવી લીધા છે.

ભારતમાં જ નહીં, વિશ્વના અનેક દેશોમાં સિમ સ્પૅપિંગ સ્કેમનો વધતો ટ્રેન્ડ જોઈ સાઈબર સિક્યોરિટીના નિષ્ણાતો ગોથે ચડ્યા છે, કારણ કે ગ્રાહકની પૂરેપૂરી સાવચેતી છતાં, અરે, ગ્રાહકે ફોન કૉલ કે મેસેજ દ્વારા કોઈ પણ મહત્ત્વની માહિતી શૅર કરી ન હોવા છતાં લુટારાઓ લૂંટને અંજામ આપી દે છે અને કોઈને કાંઈ ખબર પડતી નથી. આપણી પર્સનલ વિગતોને અડ્યા વગર લાખો રૂપિયાની તસ્કરીને મિનિટોમાં અંજામ આપતી ઑનલાઈન લુટારાઓની સિમ સ્વપ ટેક્નિક ભલભલા ટેક્નોક્રેટ્સને મૂંઝવી રહી છે. ટુ ફૅક્ટર ઑથેન્ટિફિકેશન પ્રોસેસ અને થ્રી સ્ટેપ વેરિફિકેશન જેવી ગ્રાહક સુવિધા માટે બનેલી સર્વિસિસમાં રહેલી મર્યાદાઓનો સિમ સ્વંપર્સ ભરપૂર (ગેર)ફાયદો ઉઠાવે છે.

શું છે આખરે આ સિમ સ્લૅપ સ્કેમ?

સાદી ભાષામાં કહીએ તો રૂપિયા, જરઝવેરાત, બીજી કીમતી ચીજોની અને આ ડિજિટલ યુગમાં ડેટાની ચોરીની ગાથા આપણે સાંભળી ચૂક્યા છીએ, એમ અહીં સિમ સ્પૅપિંગ કરનારા ડિજિટલ ચાંચિયાઓ તમારા ફોન નંબરની ચોરી કરી લે છે. હવે થોડાક કલાકો માટે જ ભલે, પણ તમારો ફોન નંબર તમારા બદલે બીજા કોઈ (ખાસ તો ચોર-લુટારા) પાસે હોય તો વિચારો કે તમારા નંબર પર આવતા ઓટીપી (વન ટાઈમ પાસવર્ડ) દ્વારા એ તમારા બૅન્ક એકાઉન્ટના શા હાલ કરી નાખે. બસ, કંઈક એવું જ થાય છે સિમ સ્વપિંગમાં.