ചെറിയ തുകയിൽ അപ്രതീക്ഷിത തുടക്കം 11 വർഷംകൊണ്ട് 2.5 കോടിയുടെ ഡിജിറ്റൽ മീഡിയ സംരംഭം

ഒരു പഴയ ഫ്ലെക്സ് പ്രിന്റിങ് മെഷീൻ കിട്ടിയപ്പോൾ തുടങ്ങിയ സംരംഭത്തെ റാബിയാത്ത് 20 ലക്ഷം രൂപ പ്രതിമാസ വിറ്റുവരവുള്ള ബിസിനസാക്കി വളർത്തി.

- 

വളരെ ചെറിയ മുതൽമുടക്കിൽ ഒരു സെക്കന്റ് ' ഹാൻഡ് ഫ്ലെക്സ് പ്രിന്റിങ് മെഷീൻ വിൽപനയ്ക്കായി മുന്നിലെത്തിയപ്പോൾ അതുപയോഗിച്ച് സ്വയംസംരംഭം തുടങ്ങി വിജയിച്ച വ്യക്തിയാണ് റാബിയാത്ത്. ബിരുദവും എയർപോർട്ട് മാനേജ്മെന്റിൽ ഡിപ്ലോമയും കരസ്ഥമാക്കി ഇനി എന്ത് എന്ന ചിന്തയിലിരിക്കുമ്പോഴാണ് അപ്രതീക്ഷിതമായി അവസരം മുന്നിലെത്തിയതും ഉപയോഗപ്പെടുത്തിയതും. യാതൊരു മുൻപരിചയവുമില്ലാതെ തുടങ്ങിയതാണെങ്കിലും നിലവിൽ റാബിയാത്തിന്റെ ഗ്രാഫി ഡിജി ലൈം (Graphy Digi Lime) ഇന്നു മികച്ച രീതിയിൽ മുന്നേറുന്ന ഒരു മാതൃകാ സംരംഭമാണ്.

എന്താണ് ബിസിനസ്?

ഡിജിറ്റൽ അഡ്വർടൈസ്മെന്റ് മീഡിയ എന്ന ഒറ്റവാക്കിൽ ബിസിനസിനെപ്പറ്റി പറയാം. ഫ്ലക്സ് പ്രിന്റിങ്, ക്ലോത്ത് പ്രിന്റിങ്, പേപ്പർ പ്രിന്റിങ്, ജൂട്ട് പ്രിന്റിങ്, ഡിസൈനിങ്, സൈൻ ബോർഡ് ഫിറ്റിങ്, കെട്ടിടങ്ങ ളുടെ ഇൻഡോർ വർക്കുകൾ, ട്രോഫി സെറ്റിങ്, ട്രോഫി പ്രിന്റിങ് തുടങ്ങി കസ്റ്റമറുടെ ആവശ്യങ്ങൾക്കനുസരിച്ച് എല്ലാത്തരം പ്രവൃത്തികളും ഏറ്റെടുത്തു ചെയ്യും റാബിയാത്ത്.

ഒരു പഴയ മെഷീനിൽ തുടക്കം

11 വർഷങ്ങൾക്കു മുൻപ് പഴയ ഫ്ലെക്സ് പ്രിന്റിങ് മെഷീൻ കിട്ടിയപ്പോൾ അതിനെപ്പറ്റി പഠിച്ചു, സാധ്യത കൾ മനസ്സിലാക്കി. അങ്ങനെ 23-ാം വയസ്സിൽ തുടങ്ങിയ ചെറുസ്ഥാപനം പടിപടിയായി വളർന്നു.