സ്ഥിരനിക്ഷേപം നടത്തുമ്പോൾ ജാഗ്രത മാത്രം പോരാ

ക്ലെയിം ചെയ്യാതെ കിടക്കുന്ന സ്ഥിരനിക്ഷേപത്തിന് എസ്ബി പലിശയേ ലഭിക്കൂ. നിക്ഷേപങ്ങളെക്കുറിച്ചു കൃത്യമായ ധാരണ ഉണ്ടായാൽ പിന്നീട് ഉണ്ടാകുന്ന നഷ്ടം ഒഴിവാക്കാം.

- ബാലകൃഷ്ണൻ തൃക്കങ്ങോട്

ബാങ്കുകളിൽ സ്ഥിരനിക്ഷേപം നടത്തും മുൻപ് നാം ഏറെ ജാഗ്രത പുലർത്താറുണ്ട്. പലിശനിരക്ക്, ഇടപാടുകളിലെ സുതാര്യത, സൗകര്യം തുടങ്ങിയ കാര്യങ്ങൾ താരതമ്യം ചെയ്തു മാത്രമേ അന്തിമ തീരുമാനമെടുക്കാറുള്ളൂ. എന്നാൽ, അതുകൊണ്ടുമാത്രം നമ്മുടെ ഉത്തരവാദിത്തം തീരുന്നില്ല.

നിക്ഷേപ കാലാവധി ഓർമ വയ്ക്കണം

 നേരത്തേ സ്ഥിരനിക്ഷേപം കാലാവധി പൂർത്തിയാക്കി എത്ര കാലം കഴിഞ്ഞാലും മുൻതീയതിയിൽ പുതുക്കിത്തരുമായിരുന്നു. പക്ഷേ, ഇപ്പോൾ അങ്ങനല്ല, ആർബിഐയുടെ സർക്കുലർ പ്രകാരം ക്ലെയിം ചെയ്യാതെ കിടക്കുന്ന സ്ഥിരനിക്ഷേപങ്ങൾക്ക്,എസ്ബി പലിശ (കാലാവധി പൂർത്തിയായ സ്ഥിരനിക്ഷേപത്തിന്റെ പലിശയോ എസ്ബി പലിശയോ ഏതാണോ കുറവ് അത് മാത്രമേ നൽകാനാവൂ.

അറിയണം ഇക്കാര്യങ്ങൾ

 കാലാവധി പൂർത്തിയായ സ്ഥിരനിക്ഷേപങ്ങൾ പുതുക്കാൻ മിക്ക ബാങ്കുകളും രണ്ടാഴ്ച സമയം അനുവദിക്കുന്നുണ്ട്. ഈ നിശ്ചിത കാലപരിധി ക്കുള്ളിൽ നിക്ഷേപം പുതുക്കിയില്ലെങ്കിൽ തുടർന്നുള്ള കാലത്തേക്കു സ്ഥിരനിക്ഷേപത്തിന്റെ പലിശ നഷ്ടപ്പെടും. കാലാവധി പൂർത്തിയാക്കി രണ്ടാഴ്ച ശേഷം പുതുക്കുന്ന തീയതിവരെ സേവിങ്സ് ബാങ്ക് അക്കൗണ്ട് പലിശ മാത്രമേ ലഭിക്കൂ.

ഓട്ടോ റിന്യുവൽ നല്ലതോ?

നിക്ഷേപകർക്കു പലിശനഷ്ടം സംഭവിക്കാതിരിക്കാൻ ബാങ്കുകൾ കാലവധി പൂർത്തിയായ നിക്ഷേപം ഓട്ടോ റിന്യൂവൽ ചെയ്തു നൽകും. പക്ഷേ, ഈ രീതിക്കും ചില പരിമിതികൾ ഉണ്ട്. നേരത്തേ ഉണ്ടായിരുന്ന കാലാവധിക്കു തന്നെയാണ് ഓട്ടോ റിന്യൂവലും ചെയ്തു നൽകുന്നത്. നിക്ഷേപ കാലാവധി കൂട്ടാനോ കുറയ്ക്കാനോ പറ്റില്ല.