ചക്ക തിന്നും തോറും പ്ലാവു നടാൻ തോന്നും

വിസ്മയക്കാഴ്ചകളുമായി ആയുർജാക്ക് ഫാം

- 

പലയിനം പ്ലാവുകൾ, പലതരം ചക്കകൾ, പല രുചികളുള്ള ചക്കപ്പഴങ്ങൾ മാറി മാറിക്കഴിച്ച് രസിക്കുന്ന സന്ദർശകർ, പുരയിടത്തിൽ വിളഞ്ഞ ചക്കയത്രയും പഴവും പുഴുക്കുമായി കഴിച്ചതിന്റെ ഓർമകൾ നുണയുന്ന മുതിർന്നവർ, ചക്കയുടെ ആരോഗ്യഗുണങ്ങളെക്കുറിച്ച് ആവേശത്തോടെ പറയുന്ന ചെറുപ്പക്കാർ, അതിമധുരം നിറഞ്ഞ ചക്കപ്പഴം കഴിച്ചതിന്റെ ആഹ്ലാദത്തിൽ ഒരു ചുള കൂടി എന്നു കൈ നീട്ടുന്ന കുട്ടികൾ, ഉമ്മൻചാണ്ടിയുടെ മുതൽ പോപ്പ് ഫ്രാൻസിസിന്റെ വരെ പേരുകളിൽ വളരുന്ന പ്ലാവുകൾ... അങ്ങനെ അങ്ങനെ ഭൂമിമലയാളത്തിലെ മറ്റെല്ലാ വിഷയങ്ങളും വിസ്മരിച്ച് മനുഷ്യരെല്ലാരും ചക്കയ്ക്ക് ചുറ്റും വട്ടം കൂടിയിരിക്കുന്ന രസികൻ കാഴ്ച കാണാം തൃശൂർ വേലൂരിനടുത്ത് കുറുമാൽക്കുന്നിലെ ഈ പ്ലാന്തോട്ടത്തിലെത്തിയാൽ. ചക്കപ്രേമികളെ മുഴുവൻ ഈ കുന്നിൻമുകളിലെത്തിച്ച വർഗീസ് തരകൻ എന്ന കർഷകനാകട്ടെ, എണ്ണിയാൽത്തീരാത്ത ചുളകളുള്ള ചക്കപോലെ ചക്കവിശേഷങ്ങളുടെ മധുരച്ചുളകൾ ഓരോന്നായി അടർത്തി ഓരോ സന്ദർശകനും നൽകുന്നു.