630 രൂപയിലൂടെ അതിജീവനം

ഔഷധസസ്യങ്ങളും പഴങ്ങളും മൂല്യവർധന വരുത്തി സൗന്ദര്യവർധക ഉൽപന്നങ്ങൾ

- ജെ. ജോസഫ്

തൃശൂർ പെരിങ്ങോട്ടുകര സ്വദേശി ശ്രീലക്ഷ്മി സി.എസ്. സംരംഭകയാകാൻ കാരണം കോവിഡാണ്. സ്വകാര്യ സ്കൂളിൽ അധ്യാപികയായിരുന്നു ശ്രീലക്ഷ്മി. കോവിഡ് കാലത്തു വീട്ടിലിരിക്കുമ്പോഴാണ് യുട്യൂബിൽ പ്രകൃതിദത്ത ഉൽപന്നങ്ങൾ കൊണ്ടുള്ള സോപ്പ് നിർമാണം പരിചയപ്പെട്ടത്. നേരെ പോയി 630 രൂപയുടെ സോപ്പ് കിറ്റ് വാങ്ങി. നിർമിച്ച സോപ്പിന്റെ ചിത്രം സ്വന്തം ഫെയ്സ്ബുക് പേജിൽ പോസ്റ്റ് ചെയ്തപ്പോൾ ചില്ലറ ഓർഡറുകളെത്തി. അതോടെ പ്രകൃതിദത്ത സൗന്ദര്യവർധക ഉൽപന്നങ്ങളുടെ സാധ്യത ബോധ്യമായി.

എന്നാൽ, അതുകൊണ്ടുമാത്രം സംരംഭം തുടർ വിപണി നേടണമെന്നില്ലെന്ന് ശ്രീലക്ഷ്മി പറയുന്നു. സംരംഭകന്റെ തനതു കണ്ടെത്തൽ കൂടി ചേരുമ്പോഴാണ് ഏത് ഉൽപന്നത്തിനും പുതുമ കൈവരുന്നത്. സോപ്പും ലിപ് ബാമുമൊക്കെ ഉണ്ടാക്കാനുള്ള പാഠങ്ങൾ യുട്യൂബിൽ ഒട്ടേറെയുണ്ട്.