நான் அழகா இருக்கேன்னு என்னையே உணர வைச்சது தமிழ் சினிமாதான்!

“நான் அழகா இருக்கேன்... வசீகரமா இருக்கேன்...' இந்த வார்த்தைகள் எல்லாம் தமிழ் மக்களாகிய நீங்கள் சொல்லிதான் கேட்கறேன்.

- ஷாலினி நியூட்டன்

தமிழ் சினிமா எனக்கு மரியாதை கொடுத்திருக்கு...” உண்மையாவே வசீகரிக்கும் கண்களால் சிரிக்கிறார் செஷ்விதா (எ) கனிமொழி. 'மார்கன்' படத்தின் கதை நாயகி, கதைக் கரு இவர் தான். கதையின் திருப்பு முனையாக விஜய் ஆண்டனி முதல் அத்தனை கதாபாத்திரங்களையும் ஓட விட்டிருப்பார் செஷ்விதா.

ஆனால், தமிழ் சினிமாவை விடாமல் பின்பற்றுவோருக்கு செஷ்விதாவின் அழகு 'பரமசிவன் பாத்திமா' படத்திலேயே பரிச்சயம் ஆகியிருக்கும். 'என் விரதங்கள்...' பாடலில் காந்தப் பார்வையும், கையில் மைக்குமாக கவர்ந்திருப்பார்.

வெல்கம் டூ தமிழ் சினிமா?

நிஜமாகவே எனக்கு அழகான வர வேற்பு கொடுத்திருக்கு தமிழ் சினிமா. மரியாதையா நடத்துறாங்க. பேட்டி எடுக்க வரும் எல்லோருமே நான் சில்க் மாதிரி இருக்கிறதா சொல்றாங்க.

ரொம்ப பெரிய பாராட்டு அது. அதுக்கு நான் தகுதியானவளா தெரியலை. எங்கேயும் தோல் நிறம் ஒரு பிரச்னையாகவே இல்லை. 'அழகா இருக்கே, மேக்கப் இல்லாமலேயே உங்க முகம் நல்லா இருக்கு...' இந்த வார்த்தைகள் எல்லாம் நான் இங்கே தமிழ்நாட்டில்தான் கேட்கறேன்.

'பரமசிவன் பாத்திமா' எனக்கு தமிழில் நல்ல அறிமுகம் கொடுத்தது. 'மார்கன்' படம் மூலமா அடையாளமும், அங்கீகாரமும் கிடைச்சிருக்கு.

உங்களைப் பற்றி..?

சொந்த ஊர் கர்நாடகா, பெங்களூர். பிறந்த ஊர் சேலம். எனக்கு முதலில் வச்ச பெயர் கனிமொழி. ஆனா, அம்மா கொஞ்சம் நியூமராலஜி எல்லாம் பார்ப்பாங்க. அதனால செஷ்விதா பெயர்.

நான் பி.எஸ்சி பிசிக்ஸ் படிச்சேன். கர்நாடகாவில் +1, +2 கான்செப்ட் கிடையாது. பியுசிதான்.

அம்மா காந்தி. அவங்களுக்கு சேலம் சொந்த ஊர். அப்பா ராஜா. அவர் மெட்டீரியல் கான்ட்ராக்டர்.