പുതിയ കാലം പുതിയ പഠനം

കാലം മാറുമ്പോൾ പഠനരീതി മാത്രമല്ല, പഠനശാഖകളും മാറുന്നു. ന്യൂജെൻ കാലത്തിന്റെ “ഹോട്ട്” കോഴ്സുകളെ പരിചയപ്പെടാം

- നിഥിൻ സാമുവൽ

ടോക്സിക് ബന്ധങ്ങൾ തിരിച്ചറിഞ്ഞ് എങ്ങനെ അതിൽ നിന്നു പുറത്തു കടക്കാം, അസ്ഥിക്കു പിടിച്ച പ്രണയം എങ്ങനെ പങ്കാളിയെ അറിയിക്കാം, മെസേജ് അയച്ചിട്ട് മറുപടി ലഭിക്കുന്നില്ലെങ്കിൽ നിരാശരാകാതെ എങ്ങനെ പിടിച്ചുനിൽക്കാം...?

പറഞ്ഞുവരുന്നത് എന്താണെന്നു പിടികിട്ടുന്നുണ്ടാവില്ല. എന്നാൽ പറയാം, പ്ലസ് ടു യോഗ്യതയുള്ളവർക്കായി ഡൽഹി സർവകലാശാല ഇക്കൊല്ലം അവതരിപ്പിച്ച പുതിയ കോഴ്സിൽ പഠിപ്പിക്കുന്ന കാര്യങ്ങളാണിതൊക്കെ.

"അഗാധമായ ബന്ധങ്ങളെ കാര്യക്ഷമമായി കൈകാര്യം ചെയ്യുക' (Negotiating Intimate Relationships) എന്നാണ് ഈ ഇലക്ടീവ് കോഴ്സിന്റെ പേരുതന്നെ. സൈക്കോളജി വകുപ്പിനു കീഴിലുള്ള, 4 ക്രെഡിറ്റ് ലഭിക്കുന്ന ഈ കോഴ്സ് സർവകലാശാലയിൽ പ്രവേശനം നേടുന്ന ആർക്കും പഠിക്കാം.

“ജെൻ സി' തലമുറയ്ക്ക് അത്യാവശ്യം വേണ്ട കോഴ്സ് തന്നെയാണ് ഇതെന്നാണ് ഈ രംഗത്തെ വിദഗ്ധരുടെ അഭിപ്രായം. പരമ്പരാഗത കോഴ്സുകളും ക്ലാസുകളുമൊക്കെ മാറി ഇത്തരത്തിലുള്ള പുതുതലമുറ കോഴ്സുകൾ ഇപ്പോൾ ധാരാളമുണ്ട്. ഇന്ത്യയിലും വിദേശത്തു മൊക്കെ ഉരുത്തിരിയുന്ന പുത്തൻ ജോലിസാധ്യതകളിലേക്ക് വഴിതുറക്കുന്ന കോഴ്സുകൾ.

നിർമിത ബുദ്ധിയും ഡേറ്റ സയൻസും റോബട്ടിക്സുമൊക്കെയാണ് പുതുതലമുറ കോഴ്സുകളിൽ മുൻപന്തിയിലെങ്കിലും, മുൻപേ പറഞ്ഞതുപോലെ അധികം അറിയപ്പെടാത്ത കോഴ്സുകളും കുറവല്ല. പ്ലസ് ടു കഴിഞ്ഞ് പ്രവേശനം നേടാവുന്ന, ഇന്ത്യയിൽ ലഭ്യമായ അത്തരം ചില കോഴ്സുകൾ ഇവിടെ പരിചയപ്പെടാം.

ഇഷ്ടമുള്ള വിഷയം പഠിച്ച് ഇഷ്ടപ്പെട്ട ജോലി നേടുക എന്നതാണ് പുതു തലമുറയുടെ ലക്ഷ്യം. അതാണ് ഇത്തരം കോഴ്സുകളുടെ ലക്ഷ്യവും. കോഴ്സുകളും അവ ഓഫർ ചെയ്യുന്ന പ്രധാന സർവകലാശാലകൾ/കോളജുകൾ, അവയുടെ ജോലി സാധ്യത എന്നിവയാണ് ഇവിടെ പരിചയപ്പെടുത്തുന്നത്. ഈ പട്ടിക പൂർണമല്ല എന്നതും പ്രവേശനവുമായി ബന്ധപ്പെട്ട് അതത് ഇൻസ്റ്റിറ്റ്യൂട്ടുകളുടെ വെബ്സൈറ്റ് പരിശോധിക്കണം എന്നതും ശ്രദ്ധിക്കുമല്ലോ. എല്ലാ കോഴ്സുകളും എല്ലാവർക്കും അനുയോജ്യമാകില്ല. അവരവരുടെ അഭിരുചി പരിശോധിച്ച്, ജോലി ചെയ്യാൻ താൽപര്യമുള്ള മേഖല കണ്ടെത്തി വേണം കോഴ്സുകൾ തിരഞ്ഞെടുക്കാൻ.

എഐ, ഡേറ്റ സയൻസ്, റോബട്ടിക്സ്