இந்த வார ராசி பலன்

14-6-2026 முதல் 20-6-2026 வரை

- முனைவர் முருகுபாலமுருகன்

மேஷம்

(அஸ்வினி, பரணி, கிருத்திகை 1-ஆம் பாதம்)

உங்கள் ராசிக்கு 4-ல் சுக்கிரன், 11-ல் ராகு சஞ்சரிப்பதாலும், திங்கட்கிழமை முதல் 3-ல் சூரியன் சஞ்சரிக்க இருப்பதாலும் பல்வேறு வளமான பலன்களை பெறக்கூடிய வாய்ப்புகள் வரும் நாட்களில் உண்டு.

எதிலும் தைரியத்தோடு செயல்படுவீர்கள். பிறருக்கு தந்த வாக்குறுதிகளை எளிதில் நிறைவேற்றக்கூடிய பலம் உண்டாகும். பணவரவுகள் சாதகமாக இருந்து உங்கள் தேவைகள் பூர்த்தியாகும்.

தொழில், வியாபாரத்தில் வேலையாட்கள் ஒத்துழைப்பு சிறப்பாக இருப்பதால் கடினமான பணிகளைகூட சுலபமாக செய்து முடிக்க முடியும். அரசாங்க வழியில் நீங்கள் எதிர்பார்க்கக்கூடிய உதவிகள் தற்போது கிடைக்கும். நவீனகரமான பொருட்களை வாங்குவீர்கள். வேலைக்கு செல்பவர்கள் உங்கள் திறமைகளை வெளிக்காட்டி அதிகாரியிடம் நல்ல பெயர் எடுக்கக்கூடிய வாய்ப்புகள் உண்டு.

மாணவ-மாணவியர்கள் கடினமான விஷயத்தைகூட எளிதில் புரிந்துகொள்ளும் நேரமாகும். உங்களது முன்கோபத்தை மட்டும் சற்று குறைத்துக் கொள்வது மிகவும் நல்லது. வரும் நாட்களில் ஏற்றம் மிகுந்த பலன்களை நீங்கள் பெறுவதற்கு முருக வழிபாடு மேற்கொள்வது, விநாயகருக்கு அர்ச்சனை செய்வது நன்மை தரும்.

வெற்றி தரும் நாட்கள்: 15, 16.

ரிஷபம்

(கிருத்திகை 2, 3, 4-ஆம் பாதங்கள் ரோகிணி, மிருகசீரிடம் 1, 2-ஆம் பாதங்கள்)

உங்கள் ராசிக்கு 2-ல் புதன், 11-ல் சனி சஞ்சரிப்பது நல்ல அமைப்பு என்பதால் எதிலும் தைரியத்தோடு செயல்பட்டு அடைய வேண்டிய இலக்கை அடைவீர்கள்.

பெண்கள் மூலமாக வளமான பலன்களை பெறக்கூடிய வாய்ப்புகள் உண்டு.

இருக்கக்கூடிய இடத்தில் உங்களுடைய மதிப்பும், மரியாதையும் அதிகரிக்கும்.

தொழில், வியாபாரத்தில் சந்தை சூழ்நிலை உங்களுக்கு சாதகமாக இருப்பதால் போட்ட முதலையை எளிதில் எடுக்கக்கூடிய யோகம் உண்டு. தொழில்ரீதியாக இருந்த சட்ட சிக்கல்கள் எல்லாம் வருகின்ற நாட்களில் குறையும். கணவன்-மனைவியிடையே ஒற்றுமையானது மிகவும் சிறப்பாக இருக்கக்கூடிய நேரமாகும். பேச்சில் சற்று பொறுமையோடு இருந்தால் வீண் பிரச்சினைகளைத் தவிர்க்க முடியும்.

உத்தியோகத்தில் இருப்பவர்களுக்கு வெளியூர் தொடர்புகள் மூலமாக அனுகூலமான பலன்களை அடையக்கூடிய நேரமாகும்.