ഓർമ്മകളിൽ മഞ്ഞുപെയ്യുമ്പോൾ

ഞങ്ങൾ ക്രിസ്ത്യാനികൾക്കൊരു വിശ്വാസമുണ്ട്. മരിച്ചവരെ വിളിച്ചു പ്രാർഥിച്ചാൽ അവർ വേഗം സഹായം എത്തിക്കും.

- സന്ധ്യ ഗ്രേസ്

2022 ഏപ്രിൽ 15. പെസഹാ കടന്നുപോയതേയുള്ളു, വ്യാഴം ദുഃഖവെള്ളി വെളുപ്പിന് 1 മണി. അന്നാണ് പപ്പ കെ.വി.ജോസഫ് ഞങ്ങളെ വിട്ടുപോയത്. പ്രതീക്ഷിച്ച മരണം. പപ്പ മരിച്ചതായി പോലും തോന്നിയില്ല. അടുത്ത അവധിക്കാലത്ത് ഞങ്ങൾ വീട്ടിൽ വരുമ്പോഴും മക്കളെയും കൊച്ചുമക്കളെയും സ്വീകരിക്കാൻ ജീപ്പുമായി പപ്പ വഴിയിലുണ്ടാവും എന്നേ തോന്നിയുള്ളൂ.

നാലു മക്കളാണ് ഞങ്ങൾ. സുഗന്ധ, സന്ധ്യ, സുമൻ, റോബർട്ട് പേരിൽ പോലുമുണ്ട് വൈവിധ്യം. ഒരു വർഷത്തെ ഏറ്റവും പ്രിയപ്പെട്ട ദിവസം ഏതെന്നു ചോദിച്ചാൽ ഞങ്ങൾ പെസഹാ വ്യാഴം എന്നു പറയും. വർഷത്തിൽ ഒരിക്കൽ മാത്രം ഉണ്ടാക്കുന്ന ഇന്ററിയപ്പവും കുരിശപ്പവും പാലും.

പാലിനു ടേസ്റ്റ് കൂടുന്നതു പിറ്റേന്നാണ്. ദുഃഖവെള്ളി പകൽ മുഴുവനും വൈകിട്ട് കുരിശുമല കയറി തിരിച്ചു വന്നശേഷവുമൊക്കെ അപ്പവും പാലും കഴിക്കും. അന്ന് ഒരുനേരം ഭക്ഷണം എന്നാണു വയ്പ്. പക്ഷേ, ഞങ്ങളൊക്കെ ഏറ്റവും കൂടുതൽ ഭക്ഷണം കഴിച്ചിരിക്കുന്നതു ദുഃഖവെള്ളിയാഴ്ചയാണ്.

അടുത്ത ബന്ധുക്കൾ മരിച്ചാൽ ആ വർഷം വീട്ടിൽ അപ്പം ഉണ്ടാക്കാൻ പാടില്ല. പപ്പയുടെയും മമ്മിയുടെയും ചാച്ചനും അമ്മയുമൊക്കെ മരിച്ച വർഷങ്ങളിൽ അപ്പം ഉണ്ടാക്കിയില്ല. അവരുടെ മരണത്തെക്കാൾ ഞങ്ങൾ സങ്കടപ്പെട്ടത് ആ വർഷം അപ്പം ഉണ്ടാക്കാൻ കഴിയില്ലല്ലോ എന്നോർത്താണ്.