મોંઘાદાટ રહેશે આ વર્ષે આમરસના સબડકા

દેશભરમાં વખણાતી દક્ષિણ ગુજરાતની કેરી આ વર્ષે મોંઘેરી મહેમાન બની છે. સામાન્ય રીતે આ દિવસોમાં કેરીઓથી લથબથતી આંબાવાડીઓ આ વર્ષે મોટા ભાગે વેરાન ભાસે છે. આંબાવાડીઓમાં કેરીનું ઉત્પાદન ૮૦ ટકા જેટલું ઓછું થયું છે. અપેક્ષા કરતાં ૨૦ ટકા જ ફાલ ઊતરતાં ખેડૂતો અને વેપારીઓ આ વર્ષે કેરીના કહેર રૂપે મોટી નુકસાનીથી બચવાના ઉપાય શોધી રહ્યા છે ત્યારે આવો, જાણીએ કેવી છે દક્ષિણ ગુજરાતના કેરીબજારની સ્થિતિ.

- અરવિંદ ગોંડલિયા (સુરત)

આંબે કેરી શોધવી પડે એવી આવી છે નોબત.

થોડા સમય પહેલાં નવસારીના રાજુભાઈને હાર્ટ અટેક આવ્યો. એમને હૉસ્પિટલમાં લઈ જવામાં આવ્યા. સારવાર પછી હવે એમની તબિયત સારી છે, પણ એમના હાર્ટ અટેકનું કારણ જાણીને બીજા ઘણાને હાર્ટ અટેકની ચિંતા સતાવવા લાગી છે.