വേനലിൽ വാടാതെ

മുടിക്കും ചർമത്തിനും വേനൽക്കാല പരിചരണത്തിനു വേണ്ടതെല്ലാം നമ്മുടെ അടുക്കളയിലുണ്ടെന്നേ

- 

ഈ വേനൽകാലത്ത് ചർമം കേൾക്കാൻ കൊതിക്കുന്നതെന്തെന്നോ... ദേ, ഈ പാട്ടിൻ വരിയാണ്. പൊള്ളുന്ന വെയിലല്ലേ... വെയിലത്തു വാടില്ലേ... വന്നീ തണലിൽ ഇരുന്നാട്ടെ...' ചൂട്, പൊടി, വിയർപ്, വരൾച്ച, സൺബേൺ എന്നിങ്ങനെ ചർമത്തെയും മുടിയെയും വലയ്ക്കുന്ന പ്രശ്നങ്ങളിൽ നിന്നു പരിചരണത്തിന്റെ തണലിലിരിക്കാൻ അവർ കൊതിക്കുന്നുണ്ട്. ഈ വേനൽക്കാല പരിചരണത്തിനു വേണ്ടതെല്ലാം നമ്മുടെ അടുക്കളയിൽ തന്നെയുണ്ടെന്നതിനാൽ ടെൻഷനേ വേണ്ട. ഒപ്പം ചില മുൻകരുതലുകൾ കൂടിയാകുമ്പോൾ ഏതു വേനലിലും ചർമവും മുടിയും കൂൾ.

സൺടാൻ നീക്കാൻ

വേനൽ ചർമസംരക്ഷണത്തിൽ നിന്നു മാറ്റിനിർത്താനാകില്ലല്ലോ...ടാൻ മാറ്റാനുള്ള സിംപിൾ വഴികളിതാ...

തൈരും തേനും ചേർന്നാൽ ടാൻ അകലും. ലാക്ടിക് ആസിഡ് അടങ്ങിയ തൈര് ഇരുളിമ വീണ ചർമകോശങ്ങളെ അകറ്റി പുതുചർമത്തിനു ജീവൻ നൽകും. ഇതിനൊപ്പം ഹൈഡ്രേഷൻ ഗുണങ്ങളുള്ള തേനും കൂടി ചേരുമ്പോൾ സൺടാൻ എങ്ങോ അകലും. ചർമം വരളുകയുമില്ല.

പഴുത്ത പപ്പായ കിട്ടിയാൽ ഒരു കഷണം ഉടച്ചു മുഖത്തു പുരട്ടിക്കോളൂ... പപ്പായയിലെ പാൻ എന്ന ഘടകത്തി ന് എക്സ്ഫോളിയേറ്റിങ് ഗുണങ്ങളുണ്ട്. ഇതു പതിവായി പുരട്ടിയാൽ കരിവാളിപ്പ് മാറും.

ഇതൊരു മുത്തശ്ശിക്കൂട്ടാണ്. എന്നാൽ വെയിലേറ്റു വീണ കരിവാളിപ്പകറ്റാൻ സൂപ്പറാണ്. രണ്ടു ചെറിയ സ്പൂൺ കടലമാവിൽ അര ചെറിയ സ്പൂൺ മഞ്ഞൾപ്പൊടി ചേർത്തു പാലിലോ വെള്ളത്തിലോ കുഴച്ചു മുഖത്തു പുരട്ടാം. മഞ്ഞളിലെ കുർക്കുമിൻ ചർമത്തിനു തെളിച്ചം നൽകും.

വെയിലേറ്റു വന്നാലുടൻ കറ്റാർവാഴ ജെൽ പുരട്ടിയാൽ ചർമം കൂളാകും, അധികം കരിവാളിക്കുകയുമില്ല. സെൻസിറ്റീവായ ചർമമുള്ളവർക്കും അലോവെര നല്ലതാണ്.

ചർമത്തിന് ഇൻസ്റ്റന്റ് ഗ്ലോ വേണോ... സൺടാൻ അകറ്റണോ... അൽപം തക്കാളി ഉടച്ചു മുഖത്തും ശരീരത്തിലും പുരട്ടിക്കോളൂ. തക്കാളി ഉടച്ചതിലേക്കു ചന്ദനപ്പൊടി കൂടിചേർത്തു പുരട്ടിയാൽ ചർമത്തിനു സ്വാഭാവിക തിളക്കവും ലഭിക്കും.

ഒരു ഉരുളക്കിഴങ്ങിന്റെ പകുതി ഗ്രേറ്റ് ചെയ്ത് നീരു പിഴിഞ്ഞെടുക്കുക. ഇതിലേക്ക് അരിപ്പൊടി യോജിപ്പിച്ചു മുഖത്തണിയാം. കണ്ണിനു താഴെയുള്ള കറുപ്പും മുഖത്തെ കരിവാളിപ്പും അകലാൻ നല്ലതാണ്.

വേനലിനിണങ്ങും ഫെയ്സ് മാസ്ക്

എണ്ണമയം അമിതമായി അലട്ടുന്നവർ രണ്ടു വലിയ ൺ മുൾട്ടാനി മിട്ടിയും അതു കുഴയ്ക്കാൻ പാകത്തിന് റോസ് വാട്ടറും ചേർത്തു യോജിപ്പിക്കുക. മുഖത്തു പുരട്ടി 10 മിനിറ്റിനു ശേഷം കഴുകാം.