ഇടറില്ല ഈ ചുവടുകൾ

വലതുകാൽ കാൻസർ കവർന്നെങ്കിലും തളരാതെ എംബിബിഎസ് പഠനം പൂർത്തിയാക്കുകയാണ് അനുശ്രീ

- രൂപാ ദയാബ്ജി

എട്ടാം ക്ലാസ്സിലെ അവസാന പരീക്ഷയ്ക്കു തയാറെടുക്കുന്നതിനിടയിലാണ് അനുശ്രീയുടെ വലതുകാലിൽ ഒരു വേദന വന്നത്. നടക്കുന്നതിനിടെ എവിടെയെങ്കിലും തട്ടിയോ മുട്ടിയോ ചതഞ്ഞതാകുമെന്നാണ് അച്ഛനും അമ്മയും ആദ്യം കരുതിയത്. ദിവസം ചെല്ലുംതോറും വേദന കൂടിയെന്നു മാത്രമല്ല, കണങ്കാലിൽ നീരുവച്ചു വീങ്ങാനും തുടങ്ങി.

നരിക്കുനിയിലെ വീട്ടിൽ നിന്ന് അനുശ്രീയുമായി കോഴിക്കോട് മെഡിക്കൽ കോളജിലെത്തിയ അച്ഛനോടു ഡോക്ടർ പറഞ്ഞു, "കാൻസറാണ്, കാൽ മുറിച്ചു മാറ്റേണ്ടി വരും.

ഒൻപതു വർഷങ്ങൾക്കിപ്പുറം ആ ഫ്ലാഷ് ബാക് അനുശ്രീ ഓർത്തെടുത്തത് കോഴിക്കോട് മെഡിക്കൽ കോളജ് ഹോസ്റ്റലിലെ പടിക്കെട്ടുകളിലിരുന്നാണ്. അതേ മെഡിക്കൽ കോളജിൽ എംബി ബിഎസ് നാലാംവർഷ വിദ്യാർഥിനിയാണ് അനുശ്രീ ഇന്ന്.

നാട്ടിലെയും ആർസിസിയിലെയും അഞ്ചു വർഷം നീണ്ട ചികിത്സകൾക്കൊടുവിൽ വലതുകാൽ മുട്ടിനു താഴെ വച്ചു മുറിച്ചു മാറ്റിയ ദിവസമാണ് അനുശ്രീ ആ തീരുമാനമെടുത്തത്, ഡോക്ടർമാർ തിരികെ തന്ന ഈ ജീവിതം കൊണ്ട് ഒരുപാടു പേരുടെ സങ്കടം മാറ്റണം...'കൃത്രിമക്കാലിൽ നടന്നു തുടങ്ങിയ അനുശ്രീയുടെ ജീവിതകഥയിലെ ഇടറാത്ത ചുവടുവയ്പുകളെ കുറിച്ചു കേൾക്കാം.

വേദനയുടെ തുടക്കം

അച്ഛൻ പീതാംബരന് കെഎസ്ഇബിയിലായിരുന്നു ജോലി. അമ്മ ഷീനയും റേഡിയോഗ്രഫറായ ചേട്ടൻ അതുലും അനുശ്രീയുടെ എല്ലാ കാര്യത്തിനും കൂടെ നിന്നു. നരിക്കുനി ജിഎച്ച്എസ്എസിൽ എട്ടാം ക്ലാസ്സിൽ പഠിക്കുന്ന സമയത്താണ് ആ സംഭവമെന്ന് അനുശ്രീ പറയുന്നു. “ക്രിസ്മസ് അവധി കഴിഞ്ഞ സമയം. വലതു കാലിന്റെ പാദത്തിനു മുകളിലായി കണങ്കാലിൽ അത്ര ചെറുതല്ലാത്ത വേദന. സ്കൂളിൽ സ്പോർട്സിലൊന്നും പങ്കെടുക്കാറില്ല. അതു കൊണ്ടു തന്നെ ഓടിയും ചാടിയും പരുക്കേറ്റെന്നു പറയാനാകില്ലല്ലോ.

എവിടെയെങ്കിലും തട്ടിയതാകും എന്നു കരുതി എണ്ണയും ബാമും പുരട്ടി ഒരാഴ്ച കാത്തിരുന്നെങ്കിലും വേദന കുറഞ്ഞില്ല. ആഭാഗത്തു നീർക്കെട്ടു പോലെ കണ്ടതോടെ വീ ടിനടുത്തുള്ള ഡോക്ടറെ കാണിച്ചു. അദ്ദേഹം കുറിച്ചുതന്ന മരുന്നുകൾ കഴിച്ചെങ്കിലും ഒരു കുറവുമില്ല. വിദഗ്ധ പരിശോധനയ്ക്കായി മെഡിക്കൽ കോളജിലേക്കു റഫർ ചെയ്തതു ആ ഡോക്ടർ തന്നെയാണ്.