സഫാൻ അലിയാസ് SAAF BOI

ക്രിക്കറ്റ് മൈതാനത്തു നിന്നു സിനിമയിലേക്ക് ഓടിക്കയറി, മലയാളികളുടെ സ്വന്തം സാഫ് ബോയ് ആയി മാറിയ സഫാന്റെ പുതിയ വിശേഷങ്ങൾ

- അഞ്ജലി അനിൽകുമാർ

ക്രിക്കറ്ററാകാൻ മോഹിച്ച മലപ്പുറംകാരൻ

അഞ്ചാള് കൂടിയാ ഫുട്ബോൾ കളിക്കുന്ന സ്ഥലമാണു മലപ്പുറം. അങ്ങനെ ടോട്ടൽ ഫുട്ബോൾ ജ്വരം പടർന്ന മലപ്പുറത്തെ ഒരു ക്രിക്കറ്റ് ഹബാണു ഞങ്ങളുടെ പെരിന്തൽമണ്ണ.

രവീന്ദ്ര ജഡേജയെ അടുപ്പമുള്ളവർ ജഡ്ഡു ബോയ് എന്നാണല്ലോ വിളിക്കുന്നത്. അതിൽ നിന്നു പ്രചോദനമുൾക്കൊണ്ട് സഫാൻ എന്ന ഞാൻ സാഫ് ബോയ് ആയി. അതു ക്ലിക്കായതോടെ സഫാൻ എന്ന പേര് ബാക് ഫുട്ടിലേക്കിറങ്ങി. ഇപ്പോൾ എല്ലായിടത്തും സാഫ്ബോയ്. 11-ാം വയസ്സിൽ തിരുവനന്തപുരം ക്രിക്കറ്റ് അക്കാദമിയിൽ കയറി. കേരളത്തിനു വേണ്ടി അണ്ടർ 14, 16, 19, 23 വിഭാഗങ്ങളിൽ കളത്തിലിറങ്ങി. അണ്ടർ 23 കളിക്കുമ്പോഴാണ് കോവിഡിന്റെ വരവ്. അതോടെ സീൻ ആകെ മാറി.

സഞ്ജു ചേട്ടനും (സഞ്ജു സാംസൺ) ഞാനും ഒരുമിച്ച് അക്കാദമിയിലുണ്ടായിരുന്നു. ചേട്ടൻ വഴി രാജസ്ഥാൻ റോയൽസിന്റെ കേരള പി ആർ ടീമിന്റെ ഭാഗമായി.