കാടാണ് പ്രണയം, ജീവിതവും

കാടിന്റെ സങ്കടങ്ങളും സന്തോഷങ്ങളും കണ്ട പെൺക്യാമറക്കണ്ണുകൾ. ഒരു വൈൽഫ് ഫോട്ടോഗ്രാഫറുടെ കാടനുഭവം

- സീമാ സുരേഷ്

കാടകങ്ങളിൽ മഴപെയ്യുന്നത് കണ്ടിട്ടുണ്ടോ? മഴയുടെ കനത്ത തുള്ളികൾക്കിടയിൽ ആനക്കൂട്ടം ചെളിയിലേക്കൂർന്നിറങ്ങി കളിക്കുന്നതും പുൽമേടുകളുടെ വിശാലതയിൽ മൂടൽമഞ്ഞും മഴയും ഇടയ്ക്കിടെ മിന്നിമറഞ്ഞ് ഒഴിഞ്ഞുതിർന്നുതീരുന്നതും കണ്ടിട്ടുണ്ടോ? കാർമേഘക്കറുപ്പിനൊപ്പം ആനക്കൂട്ടങ്ങൾ നടന്നുനീങ്ങുമ്പോൾ ക്യാമറയും കണ്ണും മനസ്സും കുളിർന്ന് നിന്ന് ഞാനതെല്ലാം കണ്ടു. കാടിനൊപ്പം, ആനക്കൂട്ടങ്ങൾക്കൊപ്പം മഴനനഞ്ഞ് മഴച്ചിത്രങ്ങൾ സ്വന്തമാക്കിയത് കഴിഞ്ഞദിവസമാണ്. അതും ഏറെ ഇഷ്ടപ്പെടുന്ന ഉത്തരാഖണ്ഡിലെ ജിം കോർബെറ്റ് ദേശീയോദ്യാനത്തിലെ അപ്രതീക്ഷിത മഴയിൽ...

വർഷം പതിനൊന്ന് കഴിയുന്നു കാട്ടിലേക്ക് ക്യാമറ തിരിച്ചുവെച്ചിട്ട് എത്രയെത്ര കാടോർമകൾ. മഴയിലും മഞ്ഞിലും വെയിലിലും ഇരുളിലും എത്രയോ കാതങ്ങൾ സഞ്ചരിച്ച് കാടിന്റെ സന്തോഷങ്ങളും സങ്കടങ്ങളും കണ്ടു. എന്റെ ക്യാമറ കണ്ട കാടകങ്ങളിലൂടെ, കാഴ്ച കളിലൂടെ ജീവിതം ഒഴുകിക്കൊണ്ടിരിക്കുന്നു.

ക്യാമറയും ജീവിതവും

ജോലിത്തിരക്കുകളിൽ നിന്നായിരുന്നു ആ യാത്ര പോവുന്നത്, തൃശ്ശൂർ ജില്ലയിലെ ചിമ്മിനി കാട്ടിലേക്ക്. മഴയിൽ തളിർത്ത പച്ചപ്പിലൂടെ, ഒരു നടത്തം. സമ്മാനമായി കിട്ടിയ ക്യാമറയിൽ ഫോക്കസ് പതിയാത്ത ചിത്രങ്ങളെടുത്ത് തിരിച്ചുപോക്ക്. ഫോട്ടോഗ്രഫി പഠിക്കണമെന്ന മോഹം തലയ്ക്കു പിടിച്ചുകൊണ്ട് തൃശ്ശൂരിൽ തന്നെയുള്ള ഫോട്ടോഗ്രഫി സ്കൂളിൽ ചേർന്നു. ഒഴിവുദിവസങ്ങളിൽ ഇടയ്ക്കിടെ കാട്ടിലേക്കുള്ള നടത്തങ്ങൾ. ഇതിനി ടയിൽ ജോലിയിൽ നിന്ന് രാജിവെച്ച് യാത്രകൾ മാത്രമായി. “ഇഷ്ടമുള്ളത് ചെയ്യൂ, എനിക്ക് ചെയ്യാൻ പറ്റാത്തത് നീ ചെയ്യൂ. ജീവിതത്തിലെ കൂട്ടുകാരന്റെ (സുരേഷിന്റെ വാക്കുകളിലെ ഉറപ്പായിരുന്നു എന്റെ യാത്രകളുടെ ബലം.