ജീവിതം മീ ടൂവിന് ശേഷം

സമീപകാലത്ത് ഏറെ ചർച്ച ചെയ്യപ്പെട്ട വാക്കാണ് മീ ടൂ. സ്ത്രീ മുന്നേറ്റ ചരിത്രത്തിലെ വിലപ്പെട്ട ഏട്. മീ ടൂ വിന് ശേഷം ജീവിതത്തിൽ സംഭവിക്കുന്നതെന്താണ്... രക്ഷണം

- നിലീന അത്തോളി

2006ൽ തരാണ ബുർക്കെ ആരംഭിച്ച "മീ ടൂ' മുന്നേറ്റം. പരസ്പരം ശക്തി പകരുന്ന രീതിയിൽ സ്ത്രീകളുടെ കമ്യൂണിറ്റികൾ തന്നെ മീ ടൂവുമായി ബന്ധപ്പെട്ട് കേരളത്തിൽ ഉയർന്നുവന്നു. ചില കേസുകളിലെങ്കിലും അക്രമി ശക്തനും സംഘടിതനുമാവുന്നതിനനുസരിച്ച് മീ ടൂവിന്റെ ഗതിയും മാറിമറിഞ്ഞു. തങ്ങളുടെ ഇരുപതുകളിൽ മീ ടൂ ഉന്നയിച്ച രേവതി, ആർഷ, നൂർ എന്നീ മൂന്നു പെൺകുട്ടികളുടെ ജീവിതത്തിൽ മീ ടൂവിന് ശേഷം എന്ത് സംഭവിച്ചു... ഗൃഹലക്ഷ്മി നടത്തിയ അന്വേഷണം...

ആർഷയ്ക്ക് പറയാനുള്ളത്

 ഒരു ടാറ്റൂ ആർട്ടിസ്റ്റിനെതിരേയായിരുന്നു ആർഷയുടെ വെളിപ്പെടുത്തൽ. ആദ്യഘട്ടത്തിലനുഭവിച്ച മാനസികസംഘർഷങ്ങളൊഴിച്ചാൽ മുന്നോട്ടുള്ള വഴി പിന്തുണ നിറഞ്ഞതായിരുന്നുവെന്ന് അവൾ പറയുന്നു. സിനിമാ-രാഷ്ട്രീയ-സാംസ്കാരിക രംഗം പോലെ അധികാര കേന്ദ്രമായി കരുതപ്പെടുന്ന ഇടങ്ങളുമായി ബന്ധപ്പെട്ടതല്ല ആർഷയുടെ മീടൂ ആരോപണം. അതുകൊണ്ടാവാം, അത് അല്പം ആയാസരഹിതമായത്. ആരോപണമുന്നയിച്ചയാൾക്കെതിരേ ഇരുപതോളം പേർ സമാന ആരോപണം ഉന്നയിച്ചതും ഏഴ് പോലീസ് കേസുകളും ആർഷയുടെ ആരോപണത്തിന് കൂടുതൽ സാധൂകരണം നൽകി. തുടർന്നുണ്ടായ അനുഭവങ്ങളെപ്പറ്റി ആർഷ...

കേൾക്കേണ്ടിവന്ന തമാശകൾ

 “കോടതിയിൽ കേസെത്തിയതിൽപ്പിന്നെ മജിസ്ട്രേറ്റിന് മൊഴി നൽകാൻ മാത്രമായി മൂന്നു തവണയാണ് ഞാൻ ബെംഗളൂരുവിൽ നിന്ന് കൊച്ചിയിലേക്കു വന്നത്. ഒരു കാരണവുമില്ലാതെ, എന്നെ അറിയിക്കാതെ മൊഴിയെടുക്കൽ മാറ്റി. പഠിക്കുന്ന കാലത്ത് പാർട്ട്ടൈം ജോലിയെടുത്തുണ്ടാക്കിയ  കാശാണ് ഒരുകാര്യവുമില്ലാതെ ഇങ്ങനെ ടിക്കറ്റെടുത്ത് നഷ്ടപ്പെടുത്തിയത്. ഈ അനുഭവങ്ങൾ നേരിടേണ്ടി വരുന്നതിനാൽ ഏതെങ്കിലും സ്ത്രീകൾ നിയമ സംവിധാനത്തിന്റെ സഹായം തേടുമോ എന്ന് ഞാനാലോചിക്കാറുണ്ട്. അവിടെയാണ് മീ ടൂവിന്റെ പ്രസക്തി.