അപ്പൂപ്പൻതാടിപോലെ ഒരമ്മയും മകളും

 കുട്ടിക്കാലത്തെ കൗതുകം, സോളോ ട്രാവലറിൽ നിന്ന് അപ്പൂപ്പൻതാടിയിലേക്കുള്ള പടവുകൾ പങ്കുവച്ച് സജ്ന അലി...

- അക്ഷര അർജുൻ

അപൂപ്പൻ താടിക്കൊപ്പം കെട്ടുപൊട്ടിച്ച് പായാനാണേ മോഹം... പാട്ടൊക്കെ കൊള്ളാം. പക്ഷേ, മോഹിക്കുന്നത് പെണ്ണായാലോ? ചോദ്യങ്ങൾ പിറകേവരും. അതൊന്നും കാര്യമാക്കാതെ ഇറങ്ങിത്തിരിച്ച ചിലരുണ്ട്. അപ്പൂപ്പൻ താടി എന്നറിയപ്പെടുന്ന വിശാലമായ ട്രാവൽ ഗ്രൂപ്പിന്റെ തുടക്കക്കാരിയാണ് കോഴിക്കോട്ടുകാരി സജ്ന അലി. ദേശങ്ങൾ പിന്നിട്ട് പറക്കുന്ന യാത്രികയെ കണ്ടത് ബാലുശ്ശേരിക്കടുത്തുള്ള കരിയാത്തും പാറയിലെ പച്ചയുടുപ്പിട്ട മലയോരത്ത് വച്ചാണ്. ആറുമാസം പ്രായമുള്ള ഇളയേയും കൂട്ടിയാണ് സജ്ന വന്നത്. കുറുമ്പുകാട്ടി ചിരിക്കുന്ന മകൾ അപ്പു എന്ന ഇളയെ മടിയിലിരുത്തി സജ്ന ഓർമകളിലേക്ക് ഒരു യാത്രപോയി.

യാത്ര തുടങ്ങുന്നു

“ലോറി ഡ്രൈവറായിരുന്നു ഉപ്പ അലിക്കോയ. ഓരോ യാത്രകഴിഞ്ഞും ഉപ്പ വരുന്നത് സമ്മാനങ്ങൾക്കൊപ്പം രസകരമായ അനുഭവകഥകളുമായാണ്. അതെല്ലാം മനസ്സിനെ ആഴത്തിൽ സ്വാധീനിച്ചു. കൂട്ടുവരാൻ ഉപ്പ ഇന്നില്ല. അഞ്ച് വർഷം മുൻപ് ഞങ്ങളെ വിട്ടുപിരിഞ്ഞു.

ആദ്യ യാത്ര വീട്ടിൽ കള്ളം പറഞ്ഞിട്ടായിരുന്നു. അന്നുമുതൽ എതിർപ്പുകളുണ്ടായി. ജോലി ചെയ്യുന്ന കാശൊക്കെ തെണ്ടിത്തിരിഞ്ഞ് കളയുന്നു എന്നായിരുന്നു പ്രധാന പരാതി. പഴയതൊക്കെ ഓർക്കുമ്പോൾ വിഷമമാണ്. പിന്നെ വീട്ടുകാർ ഒപ്പം നിന്നു. മകൾ വലിയ യാത്രക്കാരിയാണെന്ന് അഭിമാനത്തോടെ പറയാൻ തുടങ്ങി. വാടക വീട്ടിൽ നിന്ന് പതുക്കെ സ്വപ്നംകണ്ട വീട്ടിലേക്ക് മാറി. സഹോദരിയാണ് എന്റെ കാര്യങ്ങളെല്ലാം നോക്കിയത്. ഞാൻ പ്ലസ് ടുവിന് പഠിക്കുമ്പോൾ ഇത്താത്ത, ഹൈദരാബാദ് പേൾസ് ആന്റ് ജെംസ് എന്ന സ്ഥാപനത്തിൽ ജോലി ചെയ്യുകയായിരുന്നു. അവിടെ നിന്ന് സാധനങ്ങൾ കടം തരും. ഞങ്ങൾ വീടുകൾ തോറും കയറിയിറങ്ങി വിൽക്കും. ആ പൈസ സ്വരുക്കൂട്ടി ടി.വിയും ഫ്രിഡ്ജും വാങ്ങി.