ചർമം തിളങ്ങട്ടെ മഞ്ഞുപോലെ

 തണുപ്പുകാലത്തെ ചർമപ്രശ്നങ്ങളും പരിഹാരങ്ങളും

- ഡോ. റീമ പദ്മകുമാർ

മഞ്ഞുകാലത്ത് ചർമപ്രശ്നങ്ങൾ വലിയ തലവേദനയുണ്ടാക്കാറുണ്ട്. സൗന്ദര്യസംരക്ഷണത്തിന് പ്രത്യേക പരിഗണന കൊടുക്കേണ്ട കാലമാണ് ഇത്. ഡിസംബർ ജനുവരി മാസങ്ങളിൽ കാൽപാദങ്ങളും ചുണ്ടും വിണ്ടുപൊട്ടുക, ചർമം മൊരിഞ്ഞിളകുക, വരണ്ടുണങ്ങുക, മുടികൊഴിച്ചിൽ, താരൻ.. ഇങ്ങനെ പ്രശ്നങ്ങളുടെ ഒരു ഘോഷയാത്രതന്നെയാണ്. ചർമത്തിലെ ചുളിവുകൾ, റോസേഷ്വ(rosacea കട്ടിയേറിയ ചുവന്ന നിറത്തോടുകൂടിയ മുഖക്കുരു), എക്സിമ, വരണ്ടപാടുകൾ, ചുവന്ന ചർമം, മങ്ങിയ ചർമം എന്നിവയും തണുപ്പുകാലത്ത് ചർമത്തിന്റെ അഴകുകെടുത്തും. എന്നാൽ കൃത്യമായ പരിചരണം നൽകിയാൽ മഞ്ഞുകാലത്തും മുടിയും ചർമവും തിളങ്ങും.

വരണ്ട ചർമത്തിന്

 1. തണുപ്പുകാലത്ത് വരണ്ട ചർമമുള്ളവർ സോപ്പിന്റെ ഉപയോഗം കുറയ്ക്കണം. വീര്യം കൂടിയ സോപ്പുകളും ബോഡി വാഷും പൂർണമായും ഒഴിവാക്കാം.

2. വരണ്ട ചർമക്കാർക്ക് സ്ട്രോബറി, അവക്കാഡോ, ബനാന, കൊക്കോ ബട്ടർ, ഷിയ ബട്ടർ എന്നിവയേതെങ്കിലുമടങ്ങിയ സോപ്പോ ബോഡി വാഷോ ഉപയോഗിക്കാം. ഇത്തരം ഫേസ് വാഷും അനുയോജ്യമാണ്.

3. പയറുപൊടി, കടലമാവ് തുടങ്ങിയവ മുഖത്തു പുരട്ടി കഴുകുന്നത് നല്ലതാണ്.

4. ആഴ്ചയിൽ ഒന്നോ രണ്ടോ തവണ ബദാം എണ്ണയോ ഒലീവ് ഓയിലോ വെളിച്ചെണ്ണയോ ദേഹത്ത് പുരട്ടി പതിനഞ്ച് മിനിറ്റിന് ശേഷം കുളിക്കാം.