നിങ്ങൾ കണ്ടാലും ഇല്ലെങ്കിലും

വിഷമയ ബന്ധങ്ങൾ തുടക്കത്തിൽത്തന്നെ സൂചനകൾ തരും. അത് കാണാതെ പോകുന്നവർക്ക്, 'രക്ഷപ്പെട്ടു കൂടായിരുന്നോ' എന്ന പതിവ് ചോദ്യത്തെ പിന്നീട് നേരിടേണ്ടി വരും

- ആർ. രാജശ്രീ

അടുത്ത സുഹൃത്തായ ഒരു ഡോക്ടറുടെ വിവാഹമാണ്.  ഡോക്ടർമാരുടെ സമയത്തിന് കുറച്ചധികം വിലയുള്ളതു കൊണ്ട് അങ്ങോട്ടധികം കത്തിവയ്ക്കാറില്ലെങ്കിലും ഇങ്ങോട്ട് പറയുന്നത് താത്പര്യത്തോടെ കേട്ടിരുന്നിട്ടുണ്ട്. കേരളത്തിനകത്തു മാത്രം വട്ടം കറങ്ങിയ അനുഭവമുള്ള ഞാനും ഡൽഹിയിലെയും ഇംഗ്ലണ്ടി ലെയും ദീർഘകാലവാസത്തിന്റെ അനുഭവപരിചയമുള്ള ഈ കക്ഷിയും തമ്മിലുള്ള സംസാരം പലപ്പോഴും രണ്ടു മനോഭാവങ്ങൾ തമ്മിലുള്ള മുഖാമുഖമായിരുന്നു. കേരളത്തിലെ സ്ത്രീകളുടേത് അടഞ്ഞ ജീവിതമാണെന്നും അവരുടെ മുൻഗണനകൾ അവിശ്വസനീയമാം വിധം ബാലിശമാണെന്നും അദ്ദേഹം പറഞ്ഞു. സ്വന്തം ശരീരം, മനസ്സ്, ജീവിതം എന്നിവയെക്കുറിച്ച് അവർ പുലർത്തുന്നത് മനഃപ്പൂർവമായ അജ്ഞതയാണ്. അതിന് കാരണം കുടുംബത്തിന് (അത് ഏതു തരത്തിലുള്ളതായാലും) നൽകുന്ന അമിത പ്രാധാന്യമാണ്. കുട്ടികളോട് രക്ഷാകർത്താക്കൾക്കുള്ള ഉത്തരവാദിത്തപരമായ സമീപനം മനസ്സിലാക്കാം. എന്നാൽ അവരുടെ പൂർണമായ ഉടമസ്ഥതയും ഏജൻസിയും ഏറ്റെടുക്കുന്ന സമീപനം പ്രശ്നമാണ്. നിർഭാഗ്യവശാൽ കേരളത്തിനു ശീലം രണ്ടാമത്തേതാണ്. കുട്ടികളുടെ ആരോഗ്യകരമായ മനോനിലയ്ക്ക് അത് ഒട്ടും സഹായകമല്ല... ഇത്രയൊക്കെ അദ്ദേഹം പറഞ്ഞപ്പോഴും ഞാൻ എതിർപ്പൊന്നും രേഖപ്പെടുത്തി യില്ല. അതൊക്കെയും ചില നേരുകളാണല്ലോ.

ഒരിക്കൽ അദ്ദേഹത്തിന്റെ ജീവിത പങ്കാളിയായിരുന്ന സ്ത്രീ സ്വന്തമായ തീരുമാനങ്ങളെടുക്കാൻ ശ്രമിച്ചതിന്റെ പേരിൽ നേരിട്ട് ക്രൂരമായ അവഗണനകളുടെ ചരിത്രം അദ്ദേഹം വിസ്തരിച്ചിരുന്നു. കുടുംബത്തിന് പോലും അതിന്റെ തിക്തഫലങ്ങൾ അനുഭവിക്കേണ്ടിവന്നു. രണ്ടു വഴികളിലായപ്പോഴും പരസ്പരം പുലർത്തുന്ന ബഹുമാനത്തെയും സ്നേഹത്തെയും കുറിച്ച് അദ്ദേഹം ഒന്നും പറഞ്ഞില്ല. അതിന്റെ സുന്ദരമായ സാക്ഷ്യമാണ് അവരുടെ മകൻ