ഇത്രയ്ക്ക് ഞെട്ടണോ ഇലന്തൂരെന്നു കേട്ടാൽ

നരബലി വാർത്തകൾ നടുക്കുമ്പോൾ, ദേശപ്പെരുമ തേടി ഇലന്തൂരിന്റെ നാട്ടുവഴികളിലൂടെ...

- രാജേഷ് എ. നായർ

ഒരു വഴി മൂന്നായി പിരിയുന്ന ചെറുകവല. ഒത്ത നടുവിൽ കൂറ്റൻ അരയാലിനോടു ചേർന്ന് കൽമണ്ഡപം പോലൊരു ക്ഷേത്രം. ഇലന്തൂർ ഗണപതി അമ്പലം. അമ്പലത്തിലേക്കുള്ള വഴിയരികിൽ തലയിൽ ഒരു കെട്ടും കെട്ടി നിൽപുണ്ട് പ്രായം പത്തെഴുപത് കടന്ന ഒരു വല്യമ്മാവൻ... നാട്ടുവിശേഷങ്ങളുടെ പൊതിക്കെട്ടഴിച്ചു അദ്ദേഹം. “സൽപ്പേരിനൊന്നും വലിയ ആയുസ്സില്ലെന്നേ... പന്തളം രാജ്യത്തെ പ്രധാന ദേശങ്ങളിലൊന്നായിരുന്നു ഈ നാട്. ചേരമാൻ പെരുമാളിന്റെ കാലത്തോളം പഴക്കമുള്ള ചരിത്രം. ചെങ്ങന്നൂർ അയ്യായിരത്തിൽ പെട്ടതായിരുന്നു ഇലന്തൂർ ദേശം. എന്നിട്ട് എന്തായി. ആളുകളിപ്പോ ഈ നാടിനെ ഓർത്തുവെക്കുന്നത് നരബലിയുടെ പേരിലല്ലേ... നാട്ടുവർത്തമാനത്തിനിടെ ഒരു ബസ് കവലയിൽ ബ്രെക്കിട്ടു. കിളി ബെല്ലടിച്ചു... നീലച്ചായം പൂശിയ ബസ് പുള്ളിക്കാരനേയും കൊണ്ട് കവലകടന്ന് മറഞ്ഞു.

പേരും പെരുമയും

ഇല്ലങ്ങളുടെ ഊര് എന്നത് ഇലന്തൂർ ആയി ലോപിച്ചു എന്നതാണ് പേരുമായി ബന്ധപ്പെട്ട് കേൾക്കുന്ന കഥ. ആറന്മുള പാർഥസാരഥി ക്ഷേത്രത്തെയും ഓമല്ലൂർ രക്തകണ്ഠസ്വാമി ക്ഷേത്രത്തേയും ബന്ധിപ്പിച്ചിരുന്ന പ്രധാന കാട്ടുപാത കടന്നുപോയത് ഇലന്തൂർ വഴിയായിരുന്നു. പഥികരുടെ പ്രധാന വിശ്രമകേന്ദ്രം കൂടിയായി മാറി ദേശം. പോയകാലത്തിന്റെ അവശേഷി ഇന്നും ഇലന്തൂരിലുണ്ട്. ഇലന്തൂർ ഗവൺമെന്റ് ഹയർ സെക്കൻഡറി സ്കൂളിന് മുന്നിലെ വഴിയമ്പലം. വഴിയ ബലത്തോട് ചേർന്നുള്ള ചുമടുതാങ്ങി കുറച്ചുകാലം മുമ്പ് നിലംപൊത്തി.