ട്രാക്കിൽ പിറക്കുന്ന പെൺ കരുത്ത്‌

പെൺകുട്ടികളുടെ ഉയർച്ചയ്ക്കും ജീവിത സാഹചര്യങ്ങൾ മെച്ച പ്പെടുത്തുന്നതിലും സ്പോർട്സ് ഏതു രീതിയിലൊക്കെ സഹായകമാകുന്നു? ചില അനുഭവ സാക്ഷ്യങ്ങൾ

- രമ്യ ഹരികുമാർ

 എന്റെ ഗ്രാമത്തിൽ എല്ലാവരും കൂലിപ്പണിക്ക് പോകുന്നവരാണ്. പത്താം ക്ലാസ് കഴിഞ്ഞാൽ അവിടെ പെൺകുട്ടികളെ  കെട്ടിച്ചയയ്ക്കുമായിരുന്നു.

തുടർപഠനത്തിന് പോകുന്നവരൊക്കെ വളരെ കുറവ്.. കൂടിവന്നാൽ ടൈപ്പ്റൈറ്റിങ്ങിനോ തയ്യലിനോ പോകും. സ്പോർട്സിൽ എത്തിയിരുന്നില്ലെങ്കിൽ ഒരുപക്ഷേ ഞാനും അങ്ങനെയൊക്കെ ആവുമായിരുന്നു. ഇടുക്കി രാജക്കാടിനടുത്തുള മുല്ലക്കാനം എന്ന മലഞ്ചെരുവിൽ നിന്ന് മെഡലുകളുടെ തിളക്കമുളള ട്രാക്കിലേക്ക് ഓടിക്കയറിയ വഴികളെപ്പറ്റി പ്രീജ ശ്രീധരൻ പറയുന്നത് ഇങ്ങനെ. കഠിനാധ്വാനവും നിശ്ചയദാർഢ്യവും പ്രീജയുടെ വിജയക്കുതിപ്പിന് സ്വർണത്തിളക്കമേകി. 2010-ൽ ഗ്വാങ്ഷൗവിൽ നടന്ന ഏഷ്യൻ ഗെയിംസിൽ 10,000 മീറ്ററിൽ സ്വർണവും 5000 മീറ്ററിൽ വെള്ളിയും നേടി. വിജയങ്ങൾ മാത്രമായിരുന്നില്ല അവൾക്ക് അത്ലറ്റിക്സ് പരിചയപ്പെടുത്തിയത്. തേയിലക്കാടുകൾക്ക് പുറത്ത് മറ്റൊരു ലോകം കണ്ടിട്ടില്ലാത്ത നാട്ടിൻപുറത്തുകാരിയിൽ നിന്ന് തനിച്ച് സഞ്ചരിക്കാനും ആത്മവിശ്വാസത്തോടെ സംസാരിക്കാനും കരുത്തോടെ മുന്നോട്ടു സഞ്ചരിക്കാനും അവളെ പ്രാപ്തയാക്കുകയും ചെയ്തു.

“ഒരു ബോക്സർ അല്ലായിരുന്നെങ്കിൽ എന്റെ ജീവിതം എങ്ങനെയായിരിക്കുമെന്ന് ആർക്കറിയാം...! ഭാഗ്യവശാൽ അങ്ങനെ ചിന്തിക്കാൻ ഇപ്പോൾ ഒരു കാരണവുമില്ല. ഇടിക്കൂട്ടിൽ നിന്ന് എല്ലാവരും പിന്മാറുന്ന പ്രായത്തിൽ, ചരിത്രവിജയം സ്വന്തമാക്കിയതിന് പിന്നാലെ മേരി കോം എന്ന എക്കാലത്തെയും മികച്ച വനിതാ ബോക്സറുടെ വാക്കുകളാണിത്. ഇരട്ട കുട്ടികളുടെ അമ്മയായി തിരിച്ചെത്തി വിജയകിരീടം ചൂടിയതിന്റെ വൈകാരികത മേരിയുടെ വാക്കുകളിൽ മുഴങ്ങിയിരുന്നു. മണിപ്പൂരിലെ കോം റെംസ് ഗോത്രക്കാരി മാംഗ്തെ ചുന്ന യാങ് മേരി കോമിൽ നിന്ന് മാഗ്നിഫിഷ്യന്റ് മേരിയിലേക്കുള്ള ആ യാത്ര അത്ര എളുപ്പമുള്ള ഒന്നായിരുന്നില്ല. നാടൻ പെൺകുട്ടി ബോക്സറാവുകയോ എന്ന ചോദ്യങ്ങളെ അവഗണിച്ചു കൊണ്ട് മണിപ്പൂരിന്റെ തലസ്ഥാനമായ ഇംഫാലിലേക്കു വണ്ടി കയറുമ്പോൾ ആത്മവിശ്വാസം മാത്രമായിരുന്നു അവർക്ക് മുതൽക്കൂട്ട്.